Chief Minister Lalduhoma chuan sorkarin quality service a duh avangin tling lo leh qualify lote chu huai taka a hnawl tih a sawi a, dikna tun din chu an sorkar thupui a nih thu a sawi.
Police Training School (PTS), Thenzawlah Inrinni khan 70th Batch of Police Constable Passing Out Parade hman a ni a. He hun hi Chief Minister Lalduhoma’n khuallian niin a hmanpui a, Home Minister K. Sapdanga chu khual zahawm a ni.
Khuallian chuan sorkar hnathawk lak kawngah ‘equality for all principle’ (mi zawng zawng tana intluktlanna) hman a nih thu a sawi a. |halaite pawhin sorkarah rinna an nei thar zel tih sawiin, “Vawiina kan hmaa ding kan police thar 275-te pawh hi, duhsak bikna emaw, sawipuitu minister leh politician tel lova intihsiakna fair tak kaltlanga tlingte an ni a. An chhuanawm a ni,” a ti.
Quality service a duh avangin tling lo leh qualify lote chu huai takin a hnawl a, hei hi hnathawktu lak tharah chauh ni lo, tuna thawk mekte zingah pawh chhawr tlak lohte dapchhuahna hna an kalpui mek thu a sawi bawk.
Chief minister chuan dikna tun din chu an sorkar thupui a nih thu sawiin, “Dan bawhchhetute in chhuina kawngah te, mi sual in chhui chhuahten hremna an hmuhna tura hma in lakna kawngah te tu mitmei mah rawn veng suh u. Dik takin thawk ula, dan hi lal rawh se,” a ti.
Mizoramah zu vanga service laia thi police an tam thin chu pawi a tih thu sawiin police-te chu physical fitness tha tak nei reng tur leh an hna an luh hunah pawh chhawm zel turin a chah a. Sualna lo chhuak thar zelte hmachhawn thei tur leh mi sualte hmakhalha kal thei tura thuam chak zui zel an nih tur thu, chief minister hian a sawi bawk.
Mizoram DGP Sharad Agarwal-a pawhin trainee-ten tluang taka an training an zo thei chu a lawmpui thu a sawi a. An rilru leh an taksa tuai hriam reng tura inthunun turin a chah.
Police constable pass out-te hi mipa 249 leh hmeichhia 26, an vaiin mi 275 an ni a. Trainee-te hi armed branch atangin mi 198, unarmed branch atangin mi 51, mechanical branch atangin mi pariat leh compassionate ground-in mi 18 te an ni a. Training neih chhunga ti tha bik thlan chhuahte hnenah khuallian hian lawmman a hlan nghal a ni.
- Lawmman dawngtute chu:
- Governor Running Trophy & Gold Medal All Round Best – F Lalngaihzuala
- Chief Minister Running Trophy & Gold Medal Proficiency in Drill – H Lalremruata
- Home Minister Running Trophy & Gold Medal Proficiency in Legal Studies – Women Vanlalawmpuii
- DGP Mizoram Running Trophy & Gold Medal Proficiency in General Studies – Tluangzathanga Zahau
- Additional DGP Running Trophy & Gold Medal Proficiency in Weapon – K Lalhmangaihzuala
- IGP (Hqrs) Running Trophy & Gold Medal Proficiency in Physical Training – Zirnunsanga
- Principal Police Training School Running Trophy & Gold Medal Exemplary Conduct – F Lalngaihzuala
- DIG (Training) Running Trophy & Gold Medal Proficiency in Shooting – Richard J Lalthanmawia