Aizawl: Tun hnaia neurosurgery leh damdawi thiamna lo changtlung zelah, thluak bawk (brain tumor) enkawlna pawh a hma aiin a himin a hlawhtling zawk tawh niin mi thiamten an sawi.
Thluak bawk zawng zawng hi cancer an ni vek kher lo va, enkawlna pawh a bawk dan azirin a inang lo va, a tir têa hmuh chhuah leh enkawl vat a nihin a zual zel tur a veng thei tih an sawi.
Hemi chungchangah hian Dr. Anurag Gupta, Associate Director & Head of Unit – Neurosurgery (Max Super Speciality Hospital, Saket) chuan, “Thluak bawk hi thluak chhunga hna thawktu cell-te pangngai lo taka an lo pun thur thur avanga lo awm a. Bawk dangte chu taksa peng dang cancer atanga thluaka lo darh chhawng an ni a. Thluak bawk hi a hlauhawm loh (benign) leh a hlauhawm (malignant) chi a awm a. A hlauhawm loh chite hi muangchanga thang thin ni mah se, thluak hmun pawimawh tak tak an nek beh thin avangin harsatna lian tak an thlen thei tho,” a ti.
Thluak bawk lan chhuah dan hi a len zawng leh awmna hmunah a innghat a. Luhai/lu na ngut ngut, kaih, khaw hmuh fiah loh te, tawng fiah loh te, hriatna hloh leh mize danglam thut te, ban leh ke zawi te, leh taksa inbuktawkna hloh te hi a lan chhuah dan a ni a. Dr. Gupta chuan hetiang symptom neite chu ngaihthah lova inentir vat turin a chah.
He natna enkawlna kawngah hian zai hi a pawimawh ber berte zinga mi a la ni a. Zai hian natna nihna tak finfiah nan te, thluak tawt lutuk tihziawm nan te, bawk zai chhuah nan te, taksa chet phung enkawlna dang pek hmaaa bawk lo tihhniam nante a pui thin a. He natna zai nan hian ‘craniotomy’ (lu ruh tlem zai hawn) hi hman uar ber a ni.
Enkawlna hi zai chauh ni lovin radiation therapy te, chemotherapy te, bawk tan bika enkawlna te nen a kal kawp thin a. Damlo hrang hrangte mamawh ang zela enkawlna dik tak siamsak tur hian doctor thiam hrang hrangte tangrualin hma an la thin a ni.