Delhi-a Jantar Mantar-a a thil phut lantira chaw a ngheina hmun atanga Delhi Police-in damdawi ina an sawn hnuah activist Sonam Wangchuk chu sorkar damdawi inah enkawl a ni a. Hetih lai hian a nupui chuan an enkawlna damdawi in chu ‘a ring tawh lo’ tih sawiin high court-ah sawn a dilna ngaihtuahsak hmanhmawh turin a ngen.
Wangchuk-a hi Inrinni khan police-in ‘damdawia enkawl turin’ an hruai a, Vardhman Mahavir Medical College (VMMC) & Safdarjung Hospital-ah dah a ni a. A nupui, Gitanjali J Angmo-i chu a pasal an enkawl danah a lawm lo hle.
Angmo-i chuan X-ah, “Safdarjung Government Hospital hi ka ring tawh lo,” tiin a tar lang.
“Sonam-a potassium chu 2.9-ah tlain nunna atana hlauhawm niin an sawi a. Chutih laiin public health bulletin an tihchhuahah a zat tak hi an tar lang lovin ‘potassium level’ a tlahniam tih chauh an sawi a. A hrana laboratory-a ennaah chuan 3.5 niin a pangngai huanga awm a ni,” a ti.
“Kan ngen nawn mawlh mawlh chungin kan chhuah leh kan duh anga mi mal damdawi ina insawn min phalsak lo va. Kan awmna chhawngah hian police 30 vel an awm reng a, damdawi in pumah 100 chuang an awm a, kan chet vel khuahkhirh a ni a. Hetiang hi inenkawlna a ni lo, dan lova inhrenna a ni,” a ti.
“Sonam-a chungah hian eng pawh thleng se damdawi in thuneitute leh sorkarin a mawh a phur vek ang,” a ti bawk.
“High court-ah thlenin vawiina ngaihtuah nghal turin ka ngen a, a hriselna a chak loh tak tak hmaa Sonam-a damdawi ina sawn thuai phal turin ka tawngtai,” a ti.
Safdarjung Hospital chuan Pathianni khan Wangchuk-a hi ‘damdawia enkawl mamawhna ang pek’ a ni a, enkawl zui a la mamawh tih an sawi.
Health bulletin an tihchhuah thar berah Wangchuk-a taksaa pawimawhte chu ‘tun dinhmunah chuan a tha’ an ti a, a thisen kal vel bik erawh ‘vil ngai’ a ni tih an tar lang tih news agency ANI chuan a tar lang.
“…mi thiam bik rual awmna team hrang hrangin uluk taka enkawl zel a la mamawh a ni,” an ti.
Wangchuk-a hi exam hrang hranga thil dik lo thleng avangin Union Education Minister Dharmendra Pradhan-a bân phutin chaw a nghei a, ni 20 a nghei hman tihin Inrinni khan tihluihna nen damdawi inah dah a ni.
Cockroach Janata Party (CJP) chuan Jantar Mantar-ah bân phutna an lantir zui zel a, Thawhtannia parliament session tan niah parliament thleng kawng zawh an tum.