Aizawl: Tlungvela Eklavya Model Residential School (EMRS) sak hna kal mekah endikna tharah hna thawh zawh loh leh pawm tlak loh a tam hle tih tar lan a ni.
Mizoram State Project Monitoring Committee (MSPMC) Inspecting Team-te chuan Zirtawpni khan Ministry of Tribal Affairs hnuaia schedule tribe zirlaite tana hmun kilkhawra national standard zirna tha a thlawna buatsaihsakna tur, EMRS Tlungvel sak hna thawh mek an en dik a. He EMRS hi VRS Construction, Zonuam ten Rs vbc 23.33 (agreement amount) hmanga an thawh mek a ni. He hna hi a tirah December 20, 2021-a zawh tura ruahman leh December 21, 2024-a zawh tura pawhsei a nih hnu pawhin tun thlenga la zawh a nih loh avangin zirlaite tan harsatna lian tak a thlen nia tar lang a ni.
MSPMC team-te hian June 7, 2024-a an tlawh tuma hna zaa 55 chauh zawh a la nih laia siam that tura rawtna an lo siam tawhte chu a taka zawm a ni em tih an enfiah a. Tun thlenga endikna tharah hna thawh zawh loh leh pawm tlak loh a tam hle tih an tar lang a, hmanrua leh concrete quality-te thlengin an test nawn leh a ni.
MSPMC chuan he project hi tangkai taka chhawr a nih thuai hma chu hma an lak zel tur thu an sawi.
He endiknaah hian MSPMC member-te, EMRS Society aiawhte, PWD Quality Control Team, local council leh YMA/MHIP hruaitute bakah EMRS Tlungvel Principal F. Lalhrezuala leh a thawhpui-ten an telpui a ni.