Aizawl: Mizoram sorkar Health & Family Welfare Department chuan Nilaini khan MINECO-a Minister pisaah Mamit District Hospital Building inhlanchhawnna a buatsaih a. Zamzo Engineering Construction & Consultancy neitu Ronnie Zolianngura chuan sak zawh fel tak Mamit Hospital IPD Block hi Health Minister Lalrinpuii hriatpuinain sorkar hnenah a hlan.
He project hi Power Finance Corporation Ltd. (PFC), New Delhi CSR fund leh Mizoram sorkar atangin (70:30) intawm, Rs vbc 17.934 senga sak a ni. Hospital thar hi chhawng ngaa sang leh a zau zawng 4,240.78 sqm a ni a; hmun hma siam danglam ngai leh Covid-19 hripui avanga thawh tan hnuah daltu awm mah se, May 2, 2025 khan completion certificate pek fel tawh a ni.
Health Minister Lalrinpuii chuan a hmaa sum dawn kim loh avanga buaipui ngai hrang hrang awmte dinhmun a puitling ta leh sorkar hnenah inhlanchhawng a ni ta chu lawmawm a tih thu a sawi.
He project hian Mamit District Hospital-a khum 30 awm thin chu khum 100 awmna IPD Block-ah a hlankai a. Nu leh nau enkawlna, Emergency, Operation Theatre, Laboratory leh Medical Imaging changtlung tak te a huam a, hei hian Mamit district mipuite tana secondary healthcare service tha zawk pein, tertiary hospital-ah referral ngaihna a tihhniam beisei a ni bawk.