Aizawl: India ram state tina thisen pek tum Uttar Pradesh-a Gorakhpur tlangval Atul Singh chuan Inrinni chawhnu khan Civil Hospital, Aizawl blood bank-ah thisen a pe.
‘Mission 28 States’ tih hming vuaha state tina thisen pek tumtu Atul Singh hian Mizorama thisen pe turin Inrinni khan Delhi atangin Aizawl a pan a, Lengpui Airport a thlen hnuah Civil Hospital a pan tlang a, thisen a pe nghal a ni.
Atul Singh hi kum 28 mi niin, tun tum hi thisen thisen a pek vawi 42-na a ni a, Mission 28 States bikah chuan Mizoram hi thisen a pek 24-na a ni a. State pali a la hmabak a, chungte chu – Manipur, Tripura, Kerala leh Tamil Nadu te a ni.
Atul Singh hi Association for Voluntary Blood Donation (AVBD), Mizoram hruaitute’n an lo tawiawm a, AVBD aiawhin Vice President K Zothanpara’n chawimawina thuchei a hlan.
AVBD hruaitute chuan, Atul Singh-a hmalakna chu tha an tih thu leh chhuanawm an tih thu an sawi.