Chief Minister Lalduhoma chuan sorkarin Mizoram sorkarin minority-te a ngaihsak thu leh an sawmna hrang hrang a ngaih pawimawh thu, Inrinnia LPS Arena Falkland, Aizawl-a Joint Hnampual Students’ Organisation (JHSO) bultuma Joint Hnampual Meet-2026 buatsaih a hmanpuinaah a sawi.
Chief minister chuan Mizorama hnampual zirlai pawl pasarihten unau an nihzia hriaa joint students’ organisation an din a, inpawhna tha zawk awm theihna tura intawhkhawmna buatsaih a nih chu lawmawm a tih thu a sawi a. Intawhkhawm thupui, ‘Zo fate kan ni, inen hrang thei kan ni lo’ chu a taka nunpui a pawimawh thu a sawi.
Sorkarin minority-te a ngaihsak thu sawiin minority-ten kût hrang hranga tel tura sawmna chu a ngai pawimawh a, a rem chuan a tel zel thu a sawi a. Mizoram chu hel pawl awm lohna state ralmuang a nih avanga inngeih taka cheng ho thei an nih thu leh Mizoram hi state ralmuang taka chantir ngei tumin Mizoram sorkarin theihtawp a chhuah tih sawiin, “Kumin April 30-a HPC (D) Lalhmingthanga Sanate Faction-ten ralthuam an tun takah khan Mizoramah hnampual hel pawl awm tawh lovin remna a lo thleng a, hei hi chhawm nung zel tur a ni,” a ti.
Chief minister chuan Zo fate chu inpumkhata an awm a pawimawh thu a sawi a, mahni hnampual zia te, culture te, tawng te chhawmnung zel chungin inlungrual taka indaidanna leh inlakhranna awm lova chenho zir a tul thu a sawi a. Mizoramah hnampual tin ten mahni tawng theuh humhalh chungin inpawh taka an awmna turin tawng thuhmun hman theih a tul thu a sawi a. Mizo tawng tihhausak nan sap tawng leh Hindi aia hnampual tawng thumal sengluh uar a pawimawh thu a sawi.
Chief minister chuan kalkhawmte chu hnam sulhnute zir chiangin, internet-ah dah tam leh sap tawnga letlinga pho chhuah uar a tul tih sawiin, “Naktuka Zo fate hi vawiina mite chher tur an nih avangin ram leh hnam enkawltuten hmakhaw sang zawk thlir a tul,” a ti bawk.
Inkhawmah hian Khual zahawm Adviser to Chief Minister (Political) Lalmuanpuia Punte, MLA leh Central YMA Vice President Prof. Lalnuntluanga te pawhin thu sawiin thalaite chu hnam chanvo humhalhtu an nih thu leh Mizo an nihna vawng nunga tawng thuhmun hmanga inlungrual tak awm turin an fuih bawk.
Inkhawm hi JHSO Senior Vice Chairman Jairas Ranglong chuan a kaihruai a, JHSO General Secretary Vanlalfakhlua’n report pein JHSO Chairman Stephan Rutland leh JHSO Treasurer Ziakthangpuia ten thu an sawi bawk.
Joint Hnampual Meet buatsaihtu JHSO hi hnampual zirlai pawl hrang hrang – Mizoram Bawm Students Union, Ranglong Student Union, Hmar Student Association, Pang Zirlai Pawl, Siamsinpawlpi, Lai Student Association leh Mara Student Organisation inzawmkhawm niin, meet hi hun thumah an then a ni.