Aizawl: Aizawl Mayor H. Lalremtluanga’n Aizawl Municipal Corporation (AMC) hnuaia inziak lut engineer-te tana training buatsaih ‘Training on Safe Building Construction Practices’ tih chu khuallian niin a hmanpui.
He hun hi Thawhlehni khan Assembly Secretariat Annexe Conference Hall-ah neih a ni a, ni hnih chhung awh tur a ni.
Khuallian chuan Mizoram chu lirnghing natna hmun, Seismic zone V-a awm a nih thu leh engtik hunah pawh lirnghing na takin a nuai theih reng avangin inbuatsaihna tha neih a ngaih thu a sawi a. Tuihawk luan kawrte chu in sak phalna lehkhaa a inziah angin siam a ni em tih enzui thin turin Engineer kal khawmte a chah.
Khuallian chuan chhiatna chu dan theih a nih loh rualin, a tawrhna erawh chu tihziaawm theih a nih thu a sawi a, in sak anihin mihring himna ngai pawimawh ber turin Engineer-te chu a ngen bawk.