Aizawl: Gauhati High Court chuan Indian Air Force (IAF)-in Lengpui ram a lei zangnadawmna a neitu dik tak ni lo hnena pek a nih chungchangah chhanna pe turin Mizoram sorkar a hriattir.
Gauhati High Court Aizawl Bench chuan Thawhtanni khan IAF-in Lengpui ram a lei, ram zangnadawmna pek chhuah chungchanga Citizen Alliance for Truth & Justice (CATAJ)-ten PIL an thehluh chu ngaihtuahin ram neitu dik tak ni lo mi pahnih hnenah zangnadawmna hi eng vanga pe nge an nih tih leh eng tianga pe nge an nih chungchang fiahna thehlut turin Mizoram sorkar a hriattir.
Thubuai hi Justice Michael Zothankhuma leh Justice Budi Habung te thutna division bench-in an ngaihtuah a. IAF-in a ram an lei zau zawng hi a vaiin 110 acres niin, Rs. 1,98,78,55,155-in an lei a. Hei hi zangadawmna dawngtu pakhat, Rohmingliana hnenah Rs. 69,99,60,000 pek niin, dawngtu dang, Henry Lalremsanga Hlawnmual hnenah Rs.11,79,02,634 pek a ni bawk.
He ram hi a tirah chuan VC Pass-a neih a ni a, a hnuah LSC-ah chantirin May 9, 2005 khan mi parukin Rohmingliana hnenah an hralh anga chhinchhiah a ni a; mahse, he hralhna sale deed hi dan ang takin a register lo tih tar lan a ni.
LSC neitu dik tak zinga mi pathum – K. Lalduha, H.L. Samuel leh Ramfangzauva te chuan he ram an hralh lai hi an hriatpui loh thu leh an VC Pass chu LSC-a chantir a nih dan pawh an hriatpui loh thu an sawi bawk.
He thubuai, CATAJ and Anr. vs. Union of India & 15 Ors (PIL/3/2026)-ah hian petitioner-te aiawhin Adv. Joseph Lalchhanhima Renthlei a ding a, sorkar aiawhin Addl. AG Linda L. Fambawl a ding niin JC Lalnunsanga, Advocate on Record, Supreme Court chuan a tar lang.