Mamit district chhung, Hachhek tlangdunga chengte hi kawngchhia avangin hun rei tak atang khan an mangang tawh a, sorkar in a ngaihpawimawh zingah an tel lo tih a chiang hle tawh bawk.
Hachhek tlangdung hi khawthlang lam atanga Tripura leh Assam inkalpawhna kawng pawimawh tak a nih avangin lirthei lutchhuak an tam hle a, mahse fur khua a lo thlen apiangin nasa zawkin harsatna an tawk a, lirthei neitute an mangang a, nunna hial chan leh lirthei chetsualna avanga chan ta tam tak an awm fo ta mai.
Langkaih balu lakna kalkawng anih avangin balu phur lirthei an tlan reng a, lirthei hmanga eizawngte nitin an kal bawk. Darlak leh Tuidam inkar hi kawng a tet leh zim avangin a chhe zual hle a, kawng laih thar lah nise tlanna tlak a la nih loh bakah leimin hnawh avanga tlan theih lohna hmun tam tak a awm a, metal road a la ni lo bawk.
Hun rei tak atang tawhin he lai kawng hmang tangkaitute hian harsatna an tawk tawh a, an thiam dan danin hma la ve bawk mahse sorkar a che thei lo a, vawiin thlengin an ko eih thei chuang lo.
Chief minister leh minister dang dangte pawhin tlawhin, kal ve thin mahse a phat marna an zawng a, thiam takin an mi leh sa bakah mipuite hnenah insawifihlimna an zawng a, kawng a that phah chuang hek lo.
Kawng dang awm ta lo chu lirthei an tlan lo thei lo a, chetsualna thleng a awm leh thin a, nunna chan an awm leh thin a ni. Lirthei neitute an khawngaihthlak a, zin veivakte thlamuangin an chuang thei bawk si lo. Sorkar hian ngaihpawimawhah nei se la, phat marna zawng reng lo hian a siam theih dan dana siam mai turin hmalaksak thuai se a va tha em.