Mizoram State Human Rights Commission (SHRC) hmasa ber atana ruat, chairperson leh member-te chu Nilaini khan Durbar Hall, Lok Bhavan, Aizawlah Mizoram Larsap General (Dr) Vijay Kumar Singh-a’n rinawmna thutiam chhamtirin a la lut.
SHRC chairperson atan lak luh hi Justice Marli Vankung, Gauhati High Court judge hlui niin, Mizoram SHRC chairperson hmasa ber a ni a. Member atan Vanlalenmawia, Mizoram Judicial Service (Rtd.) leh K. Lal Nghinglova, IAS (Rtd.) te lak luh an ni bawk.
Lak luh inkhawmah hian Chief Secretary Khilli Ram Meena chuan larsapin Mizoram SHRC chairperson leh member-te a ruatna official notification a chhiar chhuak hmasa a. Hemi hnu hian larsap chuan Justice Marli Vankung leh member pahnihte chu rinawmna thu tiamtirin a la lut a ni.
Inkhawmah hian Chief Minister Lalduhoma, Speaker Lalbiakzama, PWD Minister Vanlalhlana, EF&CC Minister Lalthansanga, Leader of Opposition Lalchhandama Ralte, P&E Minister F. Rodingliana, IPRP&S Minister B. Lalchhanzova leh sawm bik mi pawimawh dangte an tel a ni.
- Justice Marli Vankung (Chairperson):
March 4, 1964-a piang a ni a. B.A. (English Hons.), LL.B. leh M. Phil (International Legal Studies) degree te neiin, 1989-ah Mizoram Judicial Service (MJS) a zawm. October 13, 2021 khan Additional Judge, Gauhati High Court atan hlankai a ni a, August 1, 2023-ah Permanent Judge atan ruat a ni. March 3, 2026-ah pension-a chhuakin tunah hian Republic Veng, Aizawlah a pasal fanaute nen an cheng mek.
- Vanlalenmawia (Member):
April 1, 1966-a piang, B.A., LLB degree nei a ni. Kum 2011 khan Mizoram Judicial Service (MJS) zawmin, March 31, 2026 khan Presiding Officer, Motor Accident Claims Tribunal (MACT), Aizawl chelh laiin a pension a. Tunah hian Tuithiang Veng, Aizawlah a nupui fanaute nen an cheng mek.
- K. Lal Nghinglova (Member):
December 1, 1956-a piang, BA (Hons) a ni. Kum 1983-ah DIPRO hna zawmin Mizoram sorkar hnuaiah hna pawimawh tak tak a thawk a, hemi hnu hian IAS zawmin AGMUT Cadre 1996 pek a ni. Mizoram leh Delhi sorkar hnuaiah Principal Secretary thleng thawkin November 30, 2016 khan a pension a. Tunah hian Ainawn Veng, Aizawlah a nupui fanaute nen an cheng mek a ni.