Parliament fur thutkhawma chhawp chhuah tum, ‘The Foreign Contribution (Regulation) Amendment Bill 2026’ duh lohna lantir nan August 11, 2026 hian Aizaw-ah kawngzawh huaihawt an tum tih Council of Churches in Mizoram (CCM) hruaitute chuan Ningania Aizawl Press Club-a thuthar thehdarhtute an kawmnaah an sawi.
CCM hruaitute chuan he bill thar hi en thuak chuan tha ve fu angin lang mah se chik zawka zir chiangtuten hman sual theih thil tam tak a inphum tel nia sawiin, minority-te leh a bikin Kristianten an tuar phah thei dawn nia an hriat thu an sawi.
Dan tharin thuneitu thar a vuah, Designated Authority chuan court phalna leh hriatpuina tel miah lo pawhin kohhran leh NGO-te ram, building leh hmunhma neihte chu chhuhsak, tihral emaw hralh theihna thuneihna sang tak a nei dawn a. License tihtawp (cancel) chauh ni lo va, foreign sum hmanga lo neih tawh nunphung leh hmunhma zawng zawng chu chhuhsak vek theih a ni dawn a, hei hi a pawi ber lai a nih thu an sawi a. Sakhaw danga inlehtir chhuanlama hmangin India hmun hrang hrangah Kristianten tihduhdahna an tawk tawh thin a, he dan kengkawhtuten an man emaw, an hmu emaw a nih chuan license cancel leh bungrua chhuhsak a awlsamtir thei dawn nia an hriat thu an sawi bawk.
Bill chungchangah hian Mizoram sorkar hmalak dan chu duhkhawp lohna an nei tih CCM hruaitute chuan an sawi a. “Sorkar chuan he dan hian a nghawng ve lem loh avangin an ngaihven tawk lo a ni thei a; amaherawhchu, a tuartu ber tur an nih avangin he bill hi hman a nih lohna turin a tawp thlengin kan dodal dawn,” an ti.
August 11, 2026 hian Aizawl-ah FCRA duh lohna lantir nan kawngzawh huaihawt an tum a. Kawngzawh hi zing dar 10:30 atanga tanin hmun hnih atanga zawh tan tura ruahman a ni a. Zarkawt leh Sikulpuikawn atanga zawh tan a ni ang a, Vana pa Hall kawtah intawhkhawmin hun hman tura ruahman a ni.
CCM member-te chauh ni lo, kohhran hrang hrang, NGO-te leh he bill duh lotu mipui zawng zawng pawh zawm ve turin an ngen a ni.
CCM hruaitute tar lan danin Mizoramah hian FCRA license nei pawl 19 an awm mek a, kohhran hminga nei chu Presbyterian leh Baptist chauh an ni a. India-ah FCRA license nei Kristian pawl zaa 12 chauh an nih laiin ram pawn atanga fund lo lut erawh zaa 55 atanga zaa 60 zet a tling thung a ni.