Aizawl: Mizoram Chief Secretary in-charge Sudhir Kumar chuan Inrinni khan Kolasib tlawhin four-lane kawngpui siamna tura forest department leh mi mal ram neitu nihna inthuah chungchang chin fel dan ngaihtuahin sorkar mi pawimawhte nen an thukhawm.
Kolasib DC Conference Hall-a thutkhawmah hian Kumar chuan four-lane kawngpui siamna tura ram lak turah, forest department leh mi mal ram neitu nihna inthuah avanga harsatnate a theih anga chin fel dan ngaihtuahho tura lo kal a nih thu a sawi.
Thutkhawmah hian Special Investigation Team (SIT) hmalaknate thlirho nghal a ni a, kawngpui kam ram humhalh (road-side reserve forest) chin tihchian dan tur pawh ngun takin an sawiho bawk.
MIRSAC leh Revenue pass-te chu department lamin Geo-tagging an tih tawh thu ngaihthlak a ni a, hei hi hmang tangkaiin khaw pali te dinhmun chu chinfel hmasak tura rel a ni.
Chief secretary in-charge leh principal secretary (GAD/EF&CC) ni bawk chuan mapping felfai tak siama forest department pawh an reserved forest huam chhungah felfai taka ramri khamin map uluk taka siam turin a chah nghal bawk.
Kolasib district huam chhunga hmasawnna ruhrel hrang hrang thawh mek leh hmachhawp awm te pawh thlirho a ni bawk.