Aizawl: New Delhi-a cham mek, Health Minister Lalrinpuii chuan Thawhtanni khan FDA Building, New Delhi-ah Food Safety & Standards Authority of India (FSSAI) Chief Executive Officer Rajit Punhani hmuin Mizoramin Food Testing Laboratory changtlung zawk a mamawh dan a sawipui.
Minister chuan Mizoram chu a mi cheng zat za zela chhutin India pumah cancer tamna ber state a nih mek thu sawiin, ram changkang zawkte angin ei leh in, thlai leh thei hrang hrangah mihring tana tha lo chemical residue a awm leh awm loh uluk taka test reng a nih theih nan laboratory tha neih a mamawh takzet tih a sawi.
Ei tur siam license pek theihna tur tawk vel laboratory mai ni lovin mipuiin an ei leh in tur zawng zawng, a siam sa leh siam lohte thlenga a him tawk leh tawk loh an hriat theihna tura surveillance tha leh chumi support tur laboratory tha Mizoramin a mamawh thu FSSAI CEO hnenah a thlen a ni.
FSSAI CEO Punhani chuan laboratory tha zawk neih theihna tura proposal leh tul dangte ngaihtuah turin technical team a rang lama Mizorama tirh a tum thu a lo hrilh nghal bawk.
CEO chuan FSSAI lamin building sakna an tum theih loh avangin sorkarin laboratory building tur hi an ruahman a ngaih tur thu a sawi a; ruahmanna awm sate pawh a hmunah en chiantir nghalin, a rang thei ang bera hmalak zui an tum thu a lo hrilh a ni.