Football Association (FA) dan khauh zawk siam hnuaiah inthliarna laka thiam loh chantir player leh official-te chu a tlem berah inkhel 10 hrem an ni tawh ang.
A hmaa FA-in inkaihhruaina an neihah hetiang lama dan bawhchhia chu inkhel vawi ruk atanga 12 hrem theih tih niin, tuna an siam thatah hian hremna chu an belh a ni.
Hetiang nunchang tha lovah hian hnam zia, vun rawng, chi inthliarna, ram mi nihna, sakhua, mipa leh hmeichhia nihna, gender thlakna, mipat hmeichhiat duh thlan leh pianphunga rualbanlohna te tlang taka sawi emaw, hetiang hawi zawnga sawi emaw pawh a tel a ni.
Dan thar hian player te, manager te leh official dangte thlengin a huam ang.
FA thuchhuahah chuan, “FA chuan inthliarna laka fihlim infiamna buatsaih tlat a tum a ni. Keini pawhin hmasawnna duhawm tak kan hmu chho zel chungin, inthliarna hian infiamna khawvelah harsatna a la siam chhunzawm zel a ni,” an ti.
“Hetiang nungchang tenawm tak dona tur hian thahnem ngai taka hma lak a ngai a, FA inkaihhruaina tharah hian Regulatory Commission te chuan hetiang thil thlengah hian a tlem berah inkhel vawi 10 hremna pe tura tih an ni tawh a ni,” an ti bawk.
Dan an bawhchhiat nasat viau chuan dan bawhchhetute chu inkhel vawi 10 aia tam pawh hrem theih an ni ang a, thil tisualtuin hma takah a sualna a pawm vat a nih thung chuan hremna zangkhai zawk pek a ni thei bawk ang.
Hetiang thilah hian inkhel vawi ruk hi hremna tlem ber a ni ang a, vawi ruk aia tlem hrem theihna kawng awm chhun chu inthliarna chu ziak chauha tih a nihin a ni ang a. Player emaw, official emaw, hetiang sualna vawi hnih titute chuan an sualna hmasa aia nasa zawkin hremna an tawng thung ang.