Aizawl: Health Minister Lalrinpuii chuan Presidency University, Bengaluru tlawhin an hotute leh zirlaite nen an inkawm.
Thawhlehnia Presidency University-a a tlawhnaah hian Chancellor Dr. Nissar Ahmed, Vice Chairperson Dr. Nafeesa Ahmed, Vice Chancellor Dr. S.J. Thiruvengadam leh Pro Vice Chancellor Dr. Vidya Shankar Shetty te chuan Minister hi an dawngsawng a ni.
Minister Lalrinpuii chuan zirlai hmachhawp thar tan turte hnenah duhsakna hlanin, zirna sang hi degree neihna ringawt a ni lo va, mi rintlak leh rintlak ni tura inbuatsaihna a nih thu a sawi a. Zirlaite chu nun uluk tur leh mawhphurhna hre reng chunga nung tur leh ruihhlo leh thil tha lo dang laka fihlim tlat turin a chah bawk.
Khawvel technology hmasawnna sawiin, digital awareness pawimawhna leh technology chu zirna leh hmasawnna atan tangkai taka hmang turin zirlaite a fuih a. India ram chu thalaite tamna ram a nih angin, thalaite chu ram hmasawnna leh dinchhuahna tura ke pen zel a tul thu a sawi bawk.
Mizoram cabinet minister a nih thleng tura a zinkawng leh harsatna a paltlangte zirlaite hmaah sawiin, hlawhtling tur chuan tumruhna leh beidawng lova beih hram hram a pawimawh thu a sawi a.
An inkhawm zawh hian minister hian university hmunhmate a tlawh chhunzawm a ni.