Aizawl: BJP Mizoram President Dr K Beichhua chuan central sorkar do aiin tha taka dawrin Mizo tan rah tha a chhuah zawk tih a sawi.
BJP Mizoram chuan Ningani khan Aijal Club-a Mc Cape Hall-ah State Executive Meeting an nei a. Hun khatna chawhma lama palai lawmna thu a sawiah Dr K Beichhua chuan, central-a politics inbeihna tha lo te chu hrethiam chiah lova lo phurpui ve vak hian awmzia a neih loh thu sawiin, Mizo mipuiten ram leh hnam tana tha turah tan rual a pawimawh thu a sawi.
India ram hi Hindu zaidam an tam zawk avanga Kristian te pawh zalen taka rawngbawl theih a nih thu leh Bangladesh emaw Pakistan-ah te awm ta se, an chep hle dawn tih sawiin, ram pum leh ram inkaihhruainaa Pathian tih chunga an kal chuan Krista chanchintha a darh zawk dawn a ni, a ti.
Dr. K. Beichhua chuan central sorkar chu min tuamhlawmtu leh malsawmna min petu a nih avangin do aia thu thlen zawk hi Mizo leh Mizoram tana rah tha chhuahna tur a nih thu a sawi a. Political party dang te an pawm ang hian BJP pawh India ram hmasawnna tana inpe hruaitu an nihna Mizoram mipuiten an hriat a ngai takzet tih a sawi bawk.
Meeting-ah hian district hrang hrang atanga agenda lut bakah, State Vice President JB Rualchhinga’n Economic Resolution leh Political Resolution te a introduce hnuah palai te chuan lungrual takin an pawm a ni.