Mizoram Labour Link LPS Pro Fight inbuatsaih nan Vanlalenkawltira’n Oriental & Pacific Boxing Federation (OPBF) silver super flyweight title a chuh dawn a, Hayate Hanada nen an inhnek ang.
Kum 23 mi, Enkawla hian Pro Fight flyweight final vawi hnih lut zawn mekin kum 2023 khan NT Lalbiakkima a hneh lo va, championship hnuhnung ber, kum 2024-ah Lalrinngheta lakah a tlawm leh a. Professional-ah insawrbing zuiin a vanglai a hmah chhoh mek avangin a vawi khat nan Pro Fight flyweight champion nih ngei a tum hle a ni.
Dinthar, Champhai tlangval hi pro boxing a luh chilh tirhah a che tha nghal lo va, a inhnek hmasak vawi thumah chak nei lovin tum khat a tlawm.
Hemi hnu hian hnual lovin a bei zui zel a, a inhnek hnuhnun vawi sarihah chak vekin a tum khat nan India pawnah fiahna a hmachhawn dawn a, Thailand-ah a feh chhuak.
TD Boxing Academy, Salem Veng, Aizawlah ngawrh takin a inpuahchah a, coach F Zoramchhana nen Thawhtanni khan Thai khawpui an pan a. Zirtawpni zanah Japanese boxer Hanada nen super flyweight huangah OPBF silver title inchuhin round 10 inhnek tura tih an ni.
OPBF hi ram hrang hrang professional boxing commission 18 intel khawmna niin India pawh a tel a. Tokyo, Japan-ah hmunpui an nei.
Asia leh Pacific huamin an hnuaiah hian super flyweight-ah Japanese fighter Aoi Yokoyama chu champion lai a ni a, Enkawla’n silver title a la thei a nih chuan title pangngai chuh thei turin rahbi a tuk nghal ang.
Boxrec rating-ah Enkawla hi Super flyweight huangah Indian boxer zinga sang ber a nih laiin khawvel pumah 94-na a ni a. A inhnekpui, tur kum 24 mi, Hanada erawh bantamweight-ah khel thinin khawvel pumah 77-na a ni ve thung a, June kha a inhnek hnuhnun ber niin Burmese fighter Zaw Zaw Naing a hneh a ni.
Professional huangah vawi 10 Enkawla a inhnek tawh a, India-ah vek niin kumin bikah tum thum inhnekin a chak vek a; Bangkok-ah Hanada a hneh a nih chuan vawi riat a chak zawnna tur a nih bakah hma lam hun êng tak a insiam dawn a, Tanzanian boxer Mchanja Yohana nen inhmachhawn thei turin ruahmanna an nei lawk.
Enkawla hian TD Boxing Academy hnuaiah Grassroot Boxing a thawhpui a, boxrec rating flyweight huanga pariatna, Yohana nen an intawng thei a nih chuan Mizote tan inhnek chhinchhiahtlak tak a ni ang.
Chutih rualin September 8-a tan tur Pro Fight-ah tel ngei a tum a, a duhthusam tihlawhtlinga champion thei turin inrintawkna a nei sang hle a ni.