Chief Minister Lalduhoma’n Mizoram Law College zirlaite hmaa a thusawi chungchangah Mizo National Front (MNF) President Zoramthanga chuan Ningani khan MNF Hnam Run-ah thu thar thehdarhtute kawmin ‘thu dik lo hmanga thalaite hruai kawi tumna leh hnam pawikhawihna thuk tak a ni’ tiin a sawisel a, August 15, 2026 hmaa mipuite hnena ngaihdam dila a thusawi sut ngei turin a phut.
MNF president chuan chief minister-in Inner Line Permit (ILP) leh Memorandum of Settlement (MoS) chungchanga a thusawite chu ram hruaitu ni zel tlak loh a nih lantirtu a ni tiin a sawi a. ILP an hman mekte pawh ‘Central sorkarin a duh chuan min paihsak thei’ tia sawi fo thin chu ‘dawih aw’ chhuahna a nih thu sawiin, inremna thuthlung, MoS chu central sorkar, Mizoram sorkar leh MNF inremna hmanga nemngheh a nih tawh thu leh Mizoram sorkar rawn lo chuan tihdanglam theih a nih loh thu a sawi bawk.
Lalduhoma’n Remna Thuthlung chungchang a sawinaah a hming dik tak pawh a hre fuh lo va, ‘Memorandum of Agreement’ leh ‘Memorandum of Understanding’ tia vawi hnih ngawt a sawi sual bakah, inremnaa hming ziaktu, khatih laia Mizoram chief secretary, Lalkhama hming a sawi bo daih mai chu Lalkhama pawhin mak a tih thu sawiin, “Hriat loh vanga sawi sual hi chu a hriatthiam theih a, hre reng chung sia sawi dik loh luih hi chu ram hruaitu lu ber tih loh tawp tur a ni,” a ti.
“MoS hi MNF leh home ministry inremna mai a ni lo va, India Parliament 53rd Amendment Act, 1986 hmanga Constitution-a Article 371-G ziah luh hial a ni,” a ti bawk.
MNF president chuan chief minister hi a dinhmun a nghet lo hle tih sawiin, Remna Thuthlung chungchangah hian MNU president a nih lai leh ZNP president a nih laia a dinhmunte thlengin a inpersan chhen tih a sawi bawk.
Zoramthanga chuan Lalduhoma’n he a thusawi hi hnam pawikhawihna leh hnam himna tiderthawngtu a nih avangin August 15, 2026 hmaa a sut lova mipuite hnena ngaihdam a dil lo a nih chuan MNF chuan a tul angin hma a la chhunzawm zel dawn tih a sawi.