European football nipui bazar inkhar hmain Mikel Arteta chuan tlar hma thuam chak a duh a, Arsenal boss hian Barcelona forward Ferran Torres chu an ngaihven thar hle niin thu a thang.
Gunners hian Real Madrid atangin Vinicius Junior an la thei ta lo a, hei vang hian hmun dangah an mit an len zui nghal niin an sawi.
Arsenal nipui bazar hi a tha thawkhat hle a, Bruno Guimaraes chuan Emirates-ah Piero Hincapie, Illan Meslier leh Christos Tzolis te a fin a. Arteta chuan a sir tlan thei tur a la zawng mek a. North London club hian Morgan Rogers an la lut thei ta lo a, Paris Saint-Germain star Bradley Barcola pawhin Emirates aia Anfield pan a duh zawk avangin an beisei ta lo.
Brazilian forward Vinicius chu thlithlai ngun viau mah se June, 2032 thleng Bernabeu-a awm zui turin contract a ziak thar tih a puan hnuah Arsenal suangtuahna chu a thamral ta a ni.
Lak luh an tum deuh an lak theih tak loh avangin Arsenal hian Torres lak luh theih dan an ngaihtuah mek tih CaughtOffside chuan a tar lang a. Manchester City player hlui hi Arteta tan hmelhriat tha a ni a, Gunners-in tlar hma atana player tangkai, kawng hrang hranga chhawr theih an mamawh ang takin a awm thei dawn a. PSG pan tur angin sawi awm mah se inremna an la siam lo.
Torres pawh hian Barcelona hnenah an chelh duh a nih chuan thil tichiang vat turin a nawr a, hei hian thu thang a tizual nasa hle a. US-a pre-season tour an neih laiin Blaugrana hian a thawhrimnate an hlut a nih chuan inbiakna an tan a beisei thu a sawi a. Sportico hnenah, “Barca hian min duh tih an lantir a ngai a ni. An lo kal thei a, kan inbe thei a, kan sawiho ang,” a ti.
Spain forward hian European club dangte nen an sawi zawm chu lawmawm a tih thu a sawi chhuak a.
Torres hian a hma hun tur thu thang leh Parc des Princes-a insawn theihna chungchang sawiin, “Heng team-te hian an duh che a nih chuan thil tha tak a ni ziah. Barca-ah contract ka la nei a. Football-ah chuan eng nge thleng dawn hriat a ni lo tih chu a dik,” a ti.