Mizoram sorkar chuan Pu Rokunga hla phuah, ‘Ro min relsak ang che’ tih chu Mizo hnam hla atan official takin a pawm a, chief minister hoa thukhawm chuan lungrual taka an thlan thu kan lo hmu hlawm awm e.
He hla hi hun hmasa lamah pawh pawl hrang hrang kalkhawmnaah sak a lo ni fo tawh thin a, a bik takin punkhawmnaah sak a hlawh thin hle. Mizo mipuite mar dektu, kan thinlung mit naute keu hawng dawt theitu a nih avangin hetianga official level-a pawm a han ni ta pawh hi a lawmawm hle.
Kan ram hi kan hmangaih tur a ni a, hla hian nasa takin min hruai thei a, kan thinlung chhungril ber min phawrhchhuahsak theitu pawh hla hi a ni thin.
Hun a lokal zel ang a, sorkar hrang hrang an lo la awm chho zel ang, political party hrang hrang pawhin an la sa chho ang a, tlawmngai pawl hrang hrangin kalkhawmnaah an la sa fo bawk ang. Kan inlungrualna tur leh min thuikhawmtu ni thei se la, a tinawmnah zawnga hman loh hram i tum zel bawk ang u.
A pawmtu sorkar ngei pawh hian beih a la tawk sawk sawk ang a, chirh thehna nasa tak an chungah a la thleng bawk mai thei. Tute pawhin he hla zahawmna tibawrhbang zawng hian khawsa lo ila, kan ram kan hmangaihzia lanna, min tipumkhattu ni reng se la, chung lam puihna dil chungin zah leh urhsun taka sak leh hman la ni reng bawk teh se.