Aizawl: Home Minister K. Sapdanga’n Government Champhai College Multipurpose Hall-ah ‘Chamdel Kut cum Fresher’s Social’ khuallian niin Thawhlehni khan a hmanpui.
Khuallian chuan Government Champhai College chu amah ngei pawh a lo zir chhuahna hmun a nih avanga a hlut thu a sawi a. Zirlai naupangte chu smartphone leh Artificial Intelligence (AI) a mamawhna apianga hman theih tur an nei chu vanneihthlak tiin, tangkai taka hmang theuh turin a fuih. Ruihhlo vanga harsatna an tawrh thinte leh rilru hrisel lohna vanga thalaite harsatna tawh chu pawi a tih thu sawiin, Mizo nun dik taka kir leh turin zirlaite chu a chah bawk.
Khualzahawm Mizoram Khadi & Village Industries (KVI) Board Chairman C. Lalremliana pawhin thu a sawi.
Govt. Champhai College Principal Lalthanpuia’n college din a nih dan leh Chamdel Kut lo chhuah dan te a sawi.
Govt. Champhai College hi August 6, 1971-a din a ni a; tunah hian Arts, Science, Computer Science leh Commerce Stream-te a awm mek a ni.