Aizawl: Mizoram Tourism Department leh Central YMA-te chuan Tourism Minister Lalnghinglova Hmar pisa-ah thawhhona thuthlung — Memorandum of Understanding (MoU) Thawhlehni khan an ziak.
Thuthlung ziahnaah hian department aiawhin Commissioner Vanlaldina Fanai-in hming a ziak a; Central YMA aiawhin President R. Lalngheta’n hming a ziak a. He hunah hian department leh Central YMA hotute an tel bawk.
Tourism minister chuan tourism chungchangah Central YMA leh tourism department-ten thawhhona thuthlung an ziak thei chu lawmawm a ti takzet tih a sawi a. “Tun hnaiah kan state-ah tourist an lo lut nasa a, heti lama kan hmalaknate leh kan hmachhawp awmte pawh a thahnem tham hle. Infrastructure leh thil dangah hmalakna hrang hrang awm mah se, a tak taka kan buaipui tur chu mihring an ni a, khualzin an tam zel avangin department chauhin a dawl zawh rual a ni lo va, YMA-te nen kan tanrual hi a ngai a ni,” a ti.
Minister chuan tourism department hi tunah department lian lo tak ni rih mah se, theihna tha tak a neih thu leh, tun atanga kum rei lo teah chuan department lian, sum thawhchhuah lamah pawh a lian zingah a tel thei ngei dawn tih a sawi bawk.
Tourism Commissioner & Secretary Vanlaldina Fanai pawhin Central YMA nen thawhhona thuthlung an ziak thei chu lawmawm a tih thu sawiin, tourism lama hmasawn tumnaah Central YMA chu neitu chan chang taka che turin a sawm a. Central YMA President R. Lalngheta pawhin theihtawp an chhuah tur thu sawiin, YMA leh tourism department thawhhona chuan rah tha a chhuah ngei a beisei thu a sawi bawk.