Council of Churches in Mizoram (CCM) — Kohhran pakua intelkhawm bultumin Thawhlehni chawhma dar 10:30 khan Aizawlah Foreign Contribution (Regulation) Act (FCRA) Amendment Bill, 2026 duh loh lantir nan kawng zawh a ni a; mi thahnem tak kawngzawhnaah hian an tel a ni.
Kawngzawh hi Zarkawt kawn leh Sikulpuikawn atanga tan niin hmun hnih atanga kawngzawhtute hi Vana Pa Hall kawtah intawkkhawmin hun tawi an hmang zui a ni.
Vana Pa Hall kawta inkhawm tawi, CCM Treasurer Upa R. Lalmalsawma kaihhruaiah hian pungkhawmten tawngtai rualna hun an hmang a. ‘Bungrua inchhuhsak theihna dan thar siam hi sut leh rawh se,’ tihte leh, ‘Sakhaw zalenna dan kan neih lai kalh zawnga dan siam hi, tha kan ti lo’ an tih bakah, ‘FCRA Amendment Bill hi a nih ang ang hian pawm chiah an ngai lo’ tiin an au rual a ni.
CCM President Rev. Dr. R. Lalbiakliana chuan thu sawiin, “India sorkar chuan FCRA Amendment Bill hi dik leh langtlang taka ram himna tura dan siam a nih thu leh Kristiante tinzawna siam a nih loh thu sawi mah se, ngun taka en chuan he dan thar hnuaiah hian Kristiante leh minority-te awh ngei ngeina tur dan hlauhawm tak a inphum a ni,” a ti.
Rev. Dr. R. Lalbiakliana hian FCRA Amendment Bill 2026 hi a nih ang anga pass a nih chuan kohhran leh NGO-te bungrua leh hmunhmate chhuhsak theih an nih dawn thu sawiin, “India Danpui Article 300A-in mi tin hnenah bungrua neih leh kawl theihna pek a nih laiin, FCRA Amendment Bill hian chu chu a kalh tlat avangin kan dodal tlat a ni,” a ti bawk.