Aizawl: Mizo Zirlai Pawl (MZP) chuan Mizoram Public Service Commission (MPSC) siam that hnatlang chhunzawm lehin Thawhlehni khan MPSC chairman leh secretary bakah officer leh thawktute pisa kai tur an dang chhunzawm.
MZP chuan an thil phutte tihhlawhtlin a nih hma loh chu tiam chin awm lovin lungawilohna hi lantir an tum thu sawiin, police-te tharum thawhna leh MPSC hruaituten police tha chakna hmanga zirlai mahni dikna chanvo phut te an pal lui duh chu an dem takzet thu an sawi.
MZP hian MPSC kalphung siamtha tura sorkarin reform committee din te, One Time Registration (OTR) hi hman tlak a nih hma chu tihtawpa need-based specific application form siam ngei te, OTR felfai loh avanga document upload kim lote offline-a thehluhna hun siamsak te, leh written exam-a tling tawh OTR reject-te tana document submit-na hun siamsak te an phut a ni.
Hetih lai hian, MPSC chuan thuchhuah siamin MZP thil phut zinga OTR tihtawp leh document upload kim lo reject-te offline-a thehluh tir leh tih te chu pawm chiah an ngai lo thung a. OTR tihtawp hi buaina chin felna a nih loh bakah applicant-te tana buaina thar siamtu tur zawk a nih thu leh, candidate zawng zawng tana thuhmun, felfai leh dan anga thil kalpui chu Commission din chhan a nih thu an sawi.
MZP-in office an kal theih loh tir avang hian MPSC chuan hriattirna thar tichhuakin, MPSC hna lak hrang hrang a written examination leh personal interview neih turte chu tiam chin awm lovin an sawn hla a, Group ‘C’ exam hun ruat tawh zawhna siamsak pawh tun dinhmunah pek chhuah theih a nih rih loh thu leh department hrang hrangte lo insiamrem rih tura hriattirin commission chuan thu a chhuah bawk.
MZP chuan MPSC leh sorkar thuneitute atanga inbiakna engmah a la awm loh avangin Nilaini hian a hun leh leh hmun ngaiah thawktute pisa kai tur hi dan chhunzawm an tum a ni.