Mizo Zirlai Pawl (MZP) chuan MPSC kal danah duh khawp lohna neiin, nimin atang khan an pisa kai tur an dang tan a, buaina tenau thlengin, police te nen reivak lo an innawr bawk.
Hetih lai hian MPSC lam hian an thiamchanna leh an kalphung hrang hrang mipuiah hrilhfiahna tichhuakin, MZP thil ngiatte chu tihhlawhtlin rem rih lovah an ngai a, MZP lamin mipuiah chhan letna siamin, an la inngur chho nasa hle.
Tun dinhmuna a lan dan chuan mipuiah thiamchan tumin hma an la ve ve a, mipui rilru hneh tumin an thiam dan danin hma an la ni berin a lang rih a, a khawi ve ve pawh thlawptu leh thlawp lotu an awm ta nual reng a ni.
Sorkar hian an buaina hi ngaihtuah rang thei se la, kan zirlai pawlte duh dan leh MPSC lam duh dan leh kal dan hi uluk zawkin ngaihtuah thuai se, buaina nasa zawk a thlen zel lohna turin dawhkana inbiak fel thuai a tha hle.
Chuti a nih loh chuan buaina hi a sang tulh tulh ang a, duh bak aia thui thlen mai a hlauhawm a, a tu ve ve pawh inphah hniamin, chumi tur chuan sorkar hian chief minister level-ah emaw tal chinfel dan ngaihtuah se la, sorkar pawh thusut leh mai mai lo turin tang tlang ngam teh se.
Buaina hi tul lovah a chhuak zui vak thei a, chumi thleng lo tur chuan sorkar hian ngaihtuahna a sen vat vat a, a tul anga hma a lak chak a ngai hle. MZP leh MPSC duh dan leh rawtnate inngaihthlaksak tawnin, police tha chakna hmang ringawt lova inbiak fel thuai a nih theih nan sorkar a chet chhuah vat a tul hle. Buaina chinfel thuai a nih loh chuan kan buai chho tulh tulh ang tih a hlauhawm.