Aizawl: MPCC Sr. Vice President Lalnunmawia Chuaungo, MPCC Vice President C. Ngunlianchunga (MLA), Zodintluanga Ralte (Ex-Minister) leh Congress Party hruaitu dangte chuan Hrangturzo bial chhunga khaw hrang hrang an tlawh.
Nilainia he bial chhung an tlawhnaa inkhawm an buatsaih hrang hrangah thusawiin Lalnunmawia Chuaungo chuan ZPM sorkar zia a sawisel a. Inthlan campaign laia restricted tender tihreh a an intiam thu sawiin, “An term chanve an hmang zo tawh a, an thutiamah ding lovin sorkar kal tawhte a chhe lamah an khum zawk a ni,” a ti. Lalnunmawia Chuaungo chuan Congress chu sorkar leh chuan NLUP changtlung leh tha zawk buatsaih an tum thu a sawi bawk.
MPCC Vice President C. Ngunlianchunga, MLA pawhin ZPM sorkar hnuaia thutak a awm loh thu sawiin, chief minister chu dawt sawi tamah a puh a. USA a tlawh tuma a thuchah sawiten Myanmar lama Mizo unaute a tihthinur thu leh, ILP leh Article 371(G) chungchanga mipuite a ti thlabar a ti, a ni.
Thu sawitu dang, MPCC Vice President Zodintluanga Ralte chuan, Congress chu central-a an sorkar kher lo pawhin Mizoramah an sorkar thei tih a sawi a. Tuna MPSC hnalak chungchanga harsatna thleng mek leh zirlai tualzawla pungkhawm te chu ZPM sorkar inthlahdah vang liau liau a nih thu a sawi a. Chief Minister-in Human Rights Commission a hlauh chhan chu sorkarin Law & Order a kenkawh zawh loh vang em ni tih chu a zawhna a nih thu a sawi bawk.