Nilaini chawhma dar 10 vel khan Champhai Tlangsam Dinthar Veng-a F. Hrangmawii tui dahkhawlna, tanky tifai tura lut leh anmahni chhanchhuak tura lutte zingah mi an thi a, he thu buatsaih mek lai hian pakhat damdawi inah enkawl mek a ni.
Tui tanky tifai tura a rawih Vanlalpeka (39) leh chhanchhuak tura zuang lut, Lalengmawia (33) te chu chhan hman lohin an thi a ni.
Thudawn danin, F. Hrangmawii hian a tui tanky inchhin phui tifai tur hian Vanlalpeka leh Vannunmawia te hi a ruai a. Tanky chhin hawn a nih hnuah Vanlalpeka hi a lut hmasa ber a; mahse, a luh rual hian boruak tlakchham avangin a tlu nghal a ni.
A tlu hmu hian a sir vela hnathawka awm mek – Lalengmawia, Vannunmawia leh Lalhmingthanga te chu chhanchhuak turin tanky chhungah hian an zuang lut nghal a. A lut hnuhnung ber, Lalhmingthanga hian a luh dawna an chhaka awmte a au hman avangin a hmun hnaivaia awmten chhanchhuah hna hi an thawk nghal a ni.
Chhanchhuah hna thawktute hian Lalhmingthanga hi nikhua hre chunga la chhuak hmasain, nikhawhrelova awm – Vanlalpeka, Lalengmawia leh Vannunmawia te hi damdawi in panpui nghal mah se Vanlalpeka leh Lalengmawia te hi chhan hman an ni ta lo a ni.
Vannunmawia erawh damdawi inah enkawl chhunzawm a ni.
Tanky hi feet sarih vela thuk, feet hnih vela tui tling a ni a. Chhanchhuah hna thawktute chuan tanky chhungah hian boruak hip tur (oxygen) a awm loh bakah a rim a chhe hle niin an sawi.
Thi ta, Vanlalpeka leh Lalengmawia te ruang hi nizan khan lumen a ni a, vawiin hian vui an ni ang.
Nunna chân, Lalengmawia hi Chalrang khua, nupui neia Tlangsama awm a ni a, a ruang hi a khua Chalrang-ah phurh a ni ang.