Mizo Zirlai Pawl (MZP) in MPSC pisa kai tur an dan chhunzawm zel a, sorkar atangin thu lawmawm an hriat hma chu chhunzawm an tum thu an sawi.
MZP lam hian an ti mai mai lo a, MPSC hi tha takin kal se an duh a, mahse MPSC leh sorkar lam hian insiamthat tumna thawm engmah an la nei lo a, an kal ngai hi kalphung dikah an la ngai ni berin a lang rih a ni.
MZP lamin an thiltih dik lo tam tak an rawn thurchhuak a, National Students Union of India (NSUI) lamin MPSC dik tawk lohna press mite hmachhawn meuhin an lo nei veleh tawh bawk.
Hetiang hi kan dinhmun a ni tawh a, zirlai hlawhtling leh thiam tak tak ten hna an hmuh theih nana hmalatu MPSC tihfuh tawk loh hi tun dinhmunah chuan a tam hle niin a lang a, sorkar lai ZPM party workers lam pawh hian lo lak nat vak chi a ni lo.
Thil tha duh theuh kan ni a, tuna a lan danah hi chuan sorkar hian MPSC siamrem lam a la hawi lo a, zirlai pawl lam lahin a tawp thlenga kal huamin an pisa kai tur an la dang reng bawk nen, a tih dan kan ngaihtuah tlan vat hi chu a ngai a ni.
Thiam thu sawi dawn chuan a khawi ve ve pawhin thiamthu sawi tur chu an nei teuh ang. Mahse, tun dinhmunah hi chuan a thawktu thlak kual emaw leh zirlaite duh dan zawm emaw hi a chinfel kawng hmasa ni chuan a lang a, chief minister awka mipuiin kan nghak ta thup a ni ber e.