Aizawl: North Eastern Council (NEC) bultumin Entertainment Society of Mizoram (ESM) leh Directorate of Information and Public Relations (I&PR) chuan Ningani khan I&PR Mini-theatre, Lianchhiari Run, Aizawlah ni hnih chhung awh tur Film-Fest 2026 (Short & Documentary Film Festival) an tan a, I&PR Secretary Betsy Zothanpari Sailo chuan a hawng.
Khuallian Betsy Zothanpari Sailo chuan film industry chu intihhlimna mai piah lamah eizawnna siamsaktu leh hnam ziarang humhalhna hmanrua a ni tiin, short film leh documentary film siamtute chu an huang zauh zel turin a chah a. Mizoram chhungah khawvel hmaa pholan tlak thil tha tam tak a awm thu sawiin, film siamtute chu tualchhung hmunhma leh thil tharte phochhuak tam turin a chah bawk.
March thlaa I&PR-in ‘Lemchan – Mizoram Film Festival’ an lo buatsaih tawh te pawh sawiin, hetiang hun te hi film lama tuimite tana an thiamna tihpunna hmun pawimawh a ni a ti bawk.
ESM Chairman B. Lallawmkima pawhin thu a sawi bawk.