Aizawl: Mizoram Public Service Commission (MPSC) siam tha tura sorkarin Reform Committee a din hnuah, Mizo Zirlai Pawl (MZP) leh hna zawngte chuan an lungawi lohna leh siam that ngai hrang hrangte chu ziakin committee-ah thehluh an tum.
Committee hian thla hnih chhungin heng thehluhte hi zirchiangin recommendation a siam dawn a, MZP chuan a vil zui zel dawn a ni.
Chief secretary-in One Time Registration (OTR) bikah helpline siam a tum leh applicant-te tanpui tura sorkar thutiam chu lawmawm an ti bawk.
MZP chuan MPSC Online Portal 2.0 leh OTR system la fel famkim tawk loh avanga candidate tam tak hnawl an ni chu pawi an tih thu sawiin, MAH&VS candidate zinga mi zaa 94 zet OTR document slot awm loh avanga hnawl an nih hnua high court thleng thil a kal ta chu entitlement dik tak palzutnaah an ngai a ni.
System technical problem leh MPSC atanga instruction felfai awm loh avanga candidate-te tawrhtir chu India Danpui (Article 14 leh Article 16) kalh a nih thu leh Supreme Court thutlukna, precedent Rajesh Kumar V. BPSC (2023) case tlawhchhanin candidate-te thiam loh a ni lo tiin an sawisel.
MZP chuan MPSC insawifiahna leh court case chhuanlama hma lak theih loh anga an sawi chu mipuite hruai kawi tumna a ni em tiin an zawt a. MPSC chu mi dang dem leh insawifiah mai lova hna zawngte tana rintlak leh rinngam a nih zel theih nana fel tak leh thianghlim taka insiam tha ngei turin an phut a ni.