Chief Minister Lalduhoma’n Aizawl Smart City Limited sum Rs vbc 16.06 senga chei thar, Mizo High Sikul Field a hawng.
Ningani chawhnua hawnna inkhawmah chief minister chuan project hi sorkar hmasate bul lo tan tawh niin hmalakna tha tak an lo kalpui avangin anni pawhin lawm takin an chhunzawm a. Tunah an lo hawng thei ta tiin lawmthu a sawi.
Chief minister chuan a tirah project hming dang an lo vuah a; mahse, kum tam tak Mizo High Sikul Field an lo tih tawh, infiammi tam takte lo chherchhuak tawh kha a hming thlak atan chuan a uiawmin an hria a, ‘Mizo High Sikul Field’ tiin an thlak leh ta tih a sawi.
Khualzahawm, UD&PA Minister K. Sapdanga pawhin thu sawiin bialtu MLA a nih angina Mizo engineer-te kutchhuak ngat, Aizawl khawpui mamawh tak mai infrastructure hlu leh parking zau tak nei a puitling ta chu lawmawm a tih thu leh thalaiten football zirna leh infiamna atan tangkai zawka an hman a beisei thu a sawi.
He hmunhma enkawltu tur management committee-ah sorkar aiawh bakah Zarkawt Local Council, NGO-te leh Mizo High School principal-te an tel dawn a. Mizo High Sikul leh HSS naupangte, Zarkawt LC, NGO te leh Zarkawt Presbyterian Kohhrante chuan man chawi lovin an hmang thei dawn a, a hnuaia lirthei dahna pawh Zarkawt LC kutah dah a ni.
He hmun hi kum 130 liam taa missionary-te biak in sak hmasak berna hmun a nih angin Zarkawt Kohhran rawtna angin biak in hmasa ber entirna inte sak a ni bawk.
Lushai Engineer-ten June 10, 2022-a contract agreement ziakin, February 4, 2023 atanga an thawh he hna hi kumin August 10 khan zawh fel a ni.