Aizawl: October, 1990 atanga kumin June thla thleng khan Mizoramah HIV kai mi 34,745 hmuhchhuah an ni tawh a. Mizorama HIV kai zingah zaa 6.49 chu mipa mahni anpui kawp atanga kai an ni.
Tun hnaia Vaivakawn YMA Hall-a Mizoram State AIDS Control Society (MSACS) buatsaih Intensified IEC Campaign, 2026 Health Minister Lalrinpuii’n a hawnna inkhawmah he thu hi tar lan a ni.
Inkhawma thu sawitu MSACS Project Director, Dr. Jane Rinsangi Ralte chuan October, 1990-a Mizorama HIV kai hmuhchhuah hmasak ber atanga kumin June thla thleng khan Mizoramah HIV kai 34,745 an awm tawh a. Aizawl district chu HIV hrik pai hmuh chhuah tamna ber district a ni a, Mizorama HIV hrik pai hmuh chhuah atanga zaa 60 aia tam mah chu Aizawl district a mi an nih thu a sawi.
Mizorama HIV kai hmuhchhuah zawng zawng atanga zaa 75 vel chu sex atanga kai an nih thu a sawi a. Sex atanga kai te zinga a tam ber — zaa 47.2 chu nupui pasal leh ngaihzawngte atanga kai an ni a, zaa 44.50 chu kawppui nghet nei lo sex hmanpui atanga kai an ni bawk.
Zaa 6.49 chu mipa mahni anpui nena condom tel lova sex hman atanga kai niin, zaa 1.72 chu mahni inzuar te an ni a, phone leh social media hmanga intawng leh sex hmanpui tura koh theih avanga kai pawh an awm a ni.
Dr. Jane Rinsangi Ralte chuan HIV hrik pai si, inhre lo mi eng emaw zat an la awm avanga hmuhchhuah tlai leh thihna hial a thleng thin chu pawi a tih thu sawiin, heng hi pumpelh a nih theih nan HIV test ngaihthah lo tur leh mahni risk dinhmun endikna website breakfree.org hmang tangkai turin mipuite a sawm bawk.