India ram pumah zalenna hmuh champha vawi 80-na chu Inrinni khan ropui taka lawm a ni a. Mizorama a lawmna pui ber, Aizawl Lammualah buatsaih niin Chief Minister Lalduhoma chu khuallian hnam puanzar a pawt pharh a, parade contingent 27-te chibai bukna a chhanglet.
Chief minister chuan zalenna sualtute chibai bukin ram hmasawnna kawnga mipui thawhhona a chhuanawm thu a sawi a; he hunah hian Mizoram sorkar hmalakna hrang hrang leh ram hmasawnna langsarte a sawi bawk.
Chief minister thusawi tlangpui atanga a lan danin sorkar chuan Mizoram economy siam thatna tur, ‘Bana Kaih (Handholding) Scheme’ leh thalaite tan Rs vbc 20 corpus fund awmna, ‘Bana Kaih Venture Capital Fund’ te a buatsaih a, Investment Policy 2025 bakah Investment Promotion Agency-te a din a ni.
Chhiah lak dan siam that avangin kum 2025–26 chhungin chhiah tlingkhawm chu Rs vbc 1,278.55 a tling a, CSS hmanga SNA SPARSH tha taka kalpui a nih avangin sorkar laipui atangin incentive Rs vbc 350 dawngin VB-GRAM (G) hmang tura inpeih hmasa ber state-te zingah a tel a, sum dah lawk Rs vbc 611.65 a tling bawk.
Khawpui leh thingtlang hmasawnna hna tura hmalakna hrang hrang sawiin chief minister chuan E-Ram Portal, DILRMP leh NAKSHA pilot project-te kaltlangin ram record-te tichangtlungin SMAVITA Property Card sem chhuah a ni a. Lo neitute tan sawhthing Support Price Rs vbc 22 pe chhuakin Champhaia sawhthing processing unit din nan DoNER ministry atangin Rs vbc 30.13 hmuh a ni a, Mizoram chu ‘Ginger Capital of India’ tia puan a ni bawk.
Transporation, kawlphetha leh tui in tur hnianghnar zawk hmuh a nih parliamentary hmalakna hrang hrang ziak lutin Thenzawl Solar Plant (10 MW) hawn a nih bakah Tuirini Small Hydel Project (24 MW) sak tan a ni a; Mualkhang LPG Bottling Plant leh rawtna thar LPG kudam 24 sak mek niin, Aizawl chu India thlasik khawpui, ‘Winter Capital of India’ atana siam tumna a awm thu a sawi.
Social sector leh inrelbawlna kawngah e-Office hmang sorkar office 45 an awm tawh a, CPGRAMS leh Mipui Aw kaltlanga thlen lo lut tam zawk chinfel a ni tawh.
Public health leh welfare chungchangah MUHCS kaltlangin damlo inenkawlna Rs vbc 178.58 pek tawh niin ruihhlo dona leh enkawlna kawngah Rehabilitation Accreditation System leh Hulhliap Short-Stay Centre-te a thawk zui a. Infiamna lamah 2036 Olympic thlira Empowering Mizoram Sports (EMS) kalpui niin ‘Best Upcoming State Promoting Sports & Physical Education’ Award an dawng a, ramngaw venhimna leh rualkhai taka inrelbawlna tura Mizoram State Human Rights Commission leh Directorate of Prosecution-te pawh din a ni tawh tih a sawi bawk.
PARADE LAWMMAN LATE:
Armed
- 34 Assam Rifles
- 5th IR Bn.
- 1st Bn. MAP
Un-armed
- Sainik School, Chhingchhip
- 20th Mizo Bn. NCC
- 1st Bn. MAP school
School
- Mt. Carmel school
- Synod HSS
- St. Pauls HSS