Aizawl: Mizoram Govt. Adhoc Aided Middle School Teachers’ Association (MIGAMSTA) chuan middle school leh high school provincialisation kalpui tum leh mek chu lawmawm an tih thu thuchhah siamin an tar lang.
August 14, 2026 chawhnu khan MIGAMSTA leh Mizoram Govt. Adhoc Aided High School Teachers’ Association (MIGAAHTA) hruaitute leh sorkar aiawh ZPM Party PAC Member-te chu Adviser to Chief Minister Lalmuanpuia Punte hoin a pisaah an inkawm a. An inkawmnaah hian sorkar lam aiawhte chuan middle school leh high school provincialisation chu kalpui tum leh mek a nih thu leh Thawhlehniah hemi pual liau liauva Council of Ministers thutkhawm a nih tur thu an sawi a ni.
He thutkhawmnaah hian zirtirtute chuan thingtlang khaw lian lo leh mihring cheng tlemna thleng a fun kim thei tura School Provincialisation kalpui a tul thu an thlen bawk.
MIGAMSTA chuan sorkar, a bik takin Chief Minister, School Education Minister leh ZPM PAC Member-ten theihtawp chhuaha hma an lakpuinaah lawmthu an sawi a, Council of Ministers thutkhawm turah pawh an chungchang thu a tha zawnga a her chhuah an beisei takzet tih an tar lang.
Pre-provincialisation leh zirlaite hmakhua ngaia hmalakpuitu khawtlang mipui, All NGO, School Managing Board leh VC/LC zawng zawngte chungah pawh MIGAMSTA chuan lawmthu an sawi bawk.