Tata Steel chuan Jamshedpur FC neitu, Jamshedpur Football & Sporting Private Limited (JFSPL)-a an chanvo zawng zawng chu Churchill Brothers Sports Club hnenah a hming maiin, Rs. 100-a hlan chhawng turin thutlukna an siam fel ta.
He thutlukna avang hian kum 10 dawn lai Indian Super League (ISL) club neitu an nihna chu a tawp ta a. Hei hi Jamshedpur FC-in ISL 2026-27 season-a an tel dawn loh thu an puan atanga chawlhkar hnih pawh tling lova a thleng a ni.
Jamshedpur FC hi kum 2017-a din a ni a, ISL-ah hmun pawimawh tak luah chhovin 2021-22 season khan League Shield an la a, a hnu kumah pawh khan league-ah hmun pawimawh tak an chang zui zel a ni.
Tata Steel Committee of Directors chuan JFSPL-a an chanvo 100% hlan chhawn hi August 14 khan an pawmpui a, he company hian football subsidiary-ah hian equity share Rs, vaibelchhe 4.08 an nei a ni.
Tata Steel leh Churchill Brothers hian hemi ni vek hian Share Purchase Agreement an ziak nghal bawk.
Tata Steel-a Corporate Services Vice President D. B. Sundara Ramam chuan, “Churchill Brothers hi Indian football-a chanchin tha tak nei tawh thin club an ni a, he inremna kan siam hian kan player leh coach-ten club football an khelh chhunzawm zel theihna hun tha a pe hi kan lawm hle a. He inhlanchhawnna tluang taka a kal theih nana thawh dunna tha tak min petu AIFF leh Churchill Brothers chungah lawmthu kan sawi a ni,” a ti.
Inhlanchhawnna hi All India Football Federation (AIFF)-in a pawmpui hnu leh thil tul dangte tihfel a nih hnuah, August 31 ral hmaa peih fel theih beisei a ni.
He inremna ang hian Churchill Brothers chuan JFSPL an thunun ang a, chumi rual chuan ISL-a he club-in sporting licence a neih chu an chhawm nghal bawk ang.
Inhlanchhawnna hian Jamshedpur FC player 12 leh coach pahnihte contract pawh a huam tel dawn a. Churchill Brothers hian heng contract-te hi September, 2026 atangin an la chhawng ang a, hei hian player leh coaching staff-te chu ISL-ah an professional career chhunzawm turin theihna a siamsak dawn a ni.
Neitu nihna inthlak chungchangah hian thuneitute phalna a la pawimawh dawn hle a. Inbiakremna tihfel tak tak a nih hmain AIFF-in he inhlanchhawnna hi an pawmpui hmasak a ngai a ni.
Goa-a hmunpui nei, Churchill Brothers hi kum 40 dawn chu Indian football-a hming langsar tak an ni tawh a. He club hi I-League-ah vawi hnih an champion tawh a, tunah hian Jamshedpur FC sporting licence-in a sang ber pawlah kir chhoh theihna hun tha an nei ta a ni.
Hetianga thil a rawn inthlak danglam chhan hi Jamshedpur FC-in July 31-a 2026-27 ISL season-a an tel dawn loh thu an puan hnuah a ni.
Club hian he thutlukna an siam chhan hi fiah takin an sawi lang lo a. Chutih ahnekin JFSPL chuan India football tihhmasawn nan, a bik takin a bulthut atanga hmalakna chu an thlawp chhunzawm zel dawn thu an sawi.
ISL-in club kaihhruai sum hailuhna thar lama hma a lak hnuah khan Jamshedpur FC chuan ISL-a an tel zel dawn leh dawn loh chungchang thutlukna siam nan hun pek belh an ngen a. AIFF chuan club-te hnenah tel an tum leh tum loh chiang taka puang tur leh participation fee tlem azawng thehlut turin a phut a, Jamshedpur FC chuan thutlukna siam nan July 31 thleng hun pawt sei turin a ngen a ni.
A tawpah he club hian ISL-a tel loh mai an thlang ta a. Churchill Brothers hnena neitu nihna hlan chhawn a ni ta hian club ISL sporting licence leh a player-te chu he inelnaah hian kawng dang atanga tel ve zel theihna a siamsak ta a ni.