Aizawl: Chief Minister Office (CMO) chuan Chief Minister Lalduhoma thusawi chungchanga hriat sual awm theiah sawi fiahna an tichhuak a. Kumin January 14-a Armed Forces Veteran Day cum Ex-Services Reunion of Mizoram, Gajraj Hall, Aizawla Chief Minister thusawinaa ‘jet fighter la hman loh’ a tih kha ‘jet fighter hman tawh loh’ tih zawk tur a nih thu leh, hei hi Sainik School hotute hnen atanga dawn a nih thu an tar lang.
Thawhtanni zan khan social media kaltlangin Chief Minister Office tar lan danin, chief minister hian Chhingchhip Sainik School a tlawh tuma school hotute nena an inkawmnaah, zirlaite tana phurna leh tumruhna tha zawk a awm theih nan Jet Fighter hman tawh loh chu an school compound-ah dah an tum thu lo hrilh an ni a. Mizo naupang tam zawk an luh theih nana awareness neihpui tura an ngenna angin chief minister pawhin October 7, 2025 khan a YouTube Channel-ah sawmna hi a lo tichhuak tawh a ni.
Gajraj Hall-a Ex-Services-te hmaa a thusawinaah hian an fate Sainik School-a luhtir tura a sawmna lamah he thu hi sawi chhuakin, ‘jet fighter, hman tawh loh’ tia sawi tur kha, ‘jet fighter, la hman loh’ tiin a sawi palh ta a. A hmuna ngaithlatute pawhin a sawi tum tak hrethiam hle mah se, tun hnuah mi thenkhatten he lai clip hi la thlaa social media-ah an thehdarh tak avangin sawi fiahna siam ta niin an tar lang bawk.