Badminton World Federation (BWF)-in a buatsaih thin world championship chu kuminah Delhi-ah khelh mek a ni a. Mak tak maiin he inelnaah hian lawmman pawisa pek a ni ngai tlat lo.
2026 BWF World Championships hi India khawpui bera Indira Gandhi Indoor Arena-ah khelh a ni a, badminton inelna ngaihhlawh hlawh hi a vawi 30-na tur a ni.
Intihsiakna hi kum 2009 hnua India-a khelh lehna hmasa ber a ni a, a buatsaihtute pawhin theihtawp chhuahin hun hriat reng tlak ni turin an inbuatsaih a ni.
BWF World Championships hi badminton intihsiakna zahawm berte zinga mi a ni a, he inelnaah hian champion-te tan lawmman pawisa pek loh thin chu an tih dan hrim hrim a ni ve tlat thung.
- Eng vangin nge BWF chuan lawmman pawisa an pek loh?
Olympics.com sawi dan chuan BWF World Championships-ah hian lawmman pawisa engmah pek a ni lo a; mahse, he intihsiakna hian badminton-ah ranking point sang ber (14,500) a pe thung a, chu chu Olympic Games neih ang zat chiah a ni a. Pathumna leh palina te chuan point 9,200 an hmu bawk ang.
Format tina champion-te chuan gold medal an dawng thin a, thiam bik tih hriat reng hlawhna tur, ‘world champion’ tia hriat hlawhna leh zahawmna an nei bawk ang.
World Championships hi BWF chuan Grade 1 – Major Event angin a thliar a, chu chu international badminton-a mi mal intihsiakna sang ber a ni.
- Eng vanga badminton-ah hian ranking point hi pawimawh em em nge an nih?
Ranking point hi badminton-ah a pawimawh em em a, chu chuan player pakhat khawvel huapa dinhmun leh World Tour Finals, Olympics leh BWF World Championships ang chi intihsiaknaa tling tur a nih leh nih loh a hriat chiantir thin a ni.
Seeding advantage hian player pakhat inkhel result a nghawng nasa em em a, point awm lo se chu player thiam tak takte pawh draw tha nei turin an buai ang a, intihsiaknaa tling turin an mangang hle ang.
Ranking chuan international intihsiakna hrang hranga player pakhat chet dan that thinzia a tilang a, chutih rualin player pakhat theihna leh khawvel huapa a hmingthat dan tehfung pawh a ni tel bawk.
India atang hian PV Sindhu, Ayush Shetty, Satwiksairaj Rankireddy leh Chirag Shetty te chu he inelnaa tel tur zingah hming langsar zual an ni a, he intihsiaknaah hian hlawhtlinna sang tak nei turin an lakah beiseina an nei sang hle.
BWF World Championships 2026 hi Thawhtanni atanga khelh tan mek kha niin Pathianni hian zawh tura ruahman a ni.