Newcastle United chuan Benfica atangin defender Amar Dedic chu pound maktaduai 30 bawr velin an la lut a, an manager thar, Matthias Jaissle-a player lak luh hmasa ber a ni.
Kum 24 mi, Dedic-a hian medical test nei zo tawhin St. James Park-a châm turin kum nga daih contract a ziak a, kum 2023-a Red Bull Salzburg-in league nomawi lan lak tum khan Jaissle-a nen hian an lo inhrawn tawh a, England-ah an inenkawl leh dawn a ni.
Austrian defender chuan, “Newcastle United zawm hi ka tan chuan thil thar leh inchhirna tur awm lo tluk a ni. Heta ka awm thei hi ka hlim tak zet a, club leh min tantu ropui tak takte tana khelh a, bul tan ka châk tawh hle a. Jaissle-a nena nen kan thawk dun leh thei dawn a, kan inhriat chian tawh avangin mikhual angah ka inngai dawn lo,” a ti.
Magpies hian an right back Kieran Trippier chu a contract a tawp hnuah man awm lovin Wolves a zawmsan a, Dedic-a hian a hmun ruak luah a tum dawn a. Chutihrualin Tino Livramento a awm ve tho avangin a tan rinrawl nih a awlsam dawn bik chuang lo.
Season hmasaah Newcastle hian 12-na ni chungin season an khar a, tun season-ah chet chhiat nawn tum tawh loin enkawltu thar nen a tharin hma an la dawn.
Magpies hian Pathianni zan dar 9:00-ah season thar atana an match hmasa ber ni turin Liverpool an hmachhawn dawn.