Aizawl: PWD Minister Vanlalhlana chuan Nilaini khan Ngaizel kopang lung tla thin laka mipui leh lirthei an him zawk nana hmalakna hrang hrangte a hmunah a enfiah.
Minister hian ADDMA, PWD leh Geology & Mining Department-te’n lung tla mai thei tur an karthlak (scaling) zawh tawh te leh, lung tla direct-a kawngpuia a tlak lohna tura kham/kopang tuam hna (draping) an thawhte a enfiah a ni.
Kumin July 8 leh 9 khan Ngaizel Petrol pump bulah lung leh leivung nasa tak a tla a, he leivung leh lung tla hnawk zualpui hi August 12 atanga 14, 2026 chhung khan then zawh niin, kawngpui hi August 14 tlai khan mipui hman theih turin hawn leh a ni. Lung lian zualpui la awmte erawh khawl nena chhut keha thiar chhuah leh turin PWD lamin hma an la mek zel a ni.
Minister Vanlalhlana chuan chhun leh zan pawh sawi lova rim taka thawktu – ADDMA, Geology & Mining Dept., QRT, Traffic Police leh Local Council-te chungah lawmthu a sawi a. Tuna hman mek, ‘Green Draping HDPE’ aia tlo zawk leh tha zawk tur, ‘Shotcrete’ hmanga lung tla venna atan shotcreting machine leina tur proposal siam a nih thu leh quotation koh mek a nih thu a sawi bawk.
Tuna Ngaizel kham tuam nana hman mek Green Draping HDPE roll 13 hi Rs nuai 19 senga ADDMA lei a ni a, Mizorama a vawikhat hmanna a nih avangin trial stage-ah a la awm rih a ni.
Kum 10 kal ta chhung khan Ngaizel lung tla avang hian mi pathumin nunna an lo chan tawh a, hliam tuar mi pariat awmin lirthei 16 leh in pawh eng emaw zat a lo delh chhe tawh a ni.