Mizoram State Mixed Martial Arts Association (MISMA) chuan professional fighter chher chhuah leh amateur-a ram pum huapa hlawhtlinna a chan mek laiin kârtawp hian hmabak lian tak a nei leh ta.
- Legacy Fighting C’ship 2-ah Sanga leh Puipuii
India chhim lama professional fight night lian ber, Legacy Fighting Championship 2-ah Inrinni zan hian Mizo fighter pahnih, Lalnunsanga leh Lalramhlumpuii an inlan dawn.
Chawnpui, Aizawla cheng mek, Khawzawl tlangval Sanga hi professional fight-a hneh loh la nei lo (2-0-0 record) niin Legacy Fighting Championship 2-ah-ah hian co-main event-ah Delhi pro-fighter tha, record 3-2-0 nei mek, Dushyant Singh nen an intum ang.
He championship-ah vek hian Lunglei nula, Puipuii hian a pro bout vawi hnihnaah amateur-a khawvel huapa medal lo la phak tawh, Fathima Afshan-i a hmachhawn ve bawk ang.
Sanga hi MISMA affiliated club SPES-a training lai niin Puipuii hi Elbruz-ah a training ve thung a. Katedan Sports Complex, Hyderabad, Telengana-a fight night-ah hian coach Lalramsangliana’n a hruai dawn a ni.
- Aturto 4.2-ah Mizo official-te
Mizo fighter-ten inelna lian an hmachhawn zan vek hian MISMA chuan Arunachal Pradesh-a India-a professional fight night lian berte zinga mi, flyweight title belt leh Rs. nuai 5 inchuhna tur, Aturto 4.2-ah referee & judge (R&J) a tir dawn bawk.
Artisan-cum-Handicraft Exhibition Centre, Chimpu, Itanagar-a khelh tur inelnaah hian international R&J, MISMA General Secretary Samuel Lalrozama chu event commissioner a ni dawn a; national R&J, MISMA Treasurer Lalthakima leh MISMA Eexecutive Committee member Lalchhuanmawia ten R&J hna an thawk bawk ang.