Aizawl: School Education Directorate Committee Room-ah Education Minister Dr. Vanlalthlana hovin Mizoram Education Reforms Committee (MERC) thutkhawm vawi 17-na neih a ni a. Sorkar leh Kohhran thawhhona atanga school enkawl dan tur, Public Private Partnership (PPP) mode ruahmanna pawmin kum 2027 academic session tan atanga kalpui tan dan tur ruahmanna an duang nghal.
Zirtawpnia thutkhawmah hian MERC ruahmanna siam dan chuan, September atanga November, 2026 chhung hian sorkarin PPP mode atan hian thil tul hrang hrang a buaipui ang a, December, 2026-ah a thawhpui tur school-te thlang felin Memorandum of Understanding (MoU) ziah fel tum a ni.
February, 2027 chhungin partner-te hnenah school hi inhlan fel hman a, 2027 academic session tan a nih veleh PPP mode school-te hian hna an tan nghal theih nan ruahmanna duan a ni bawk.
Thutkhawmah hian ‘Draft Mizoram Education (Transfer & Posting of School Teachers) Rules, 2026’ pawh hman theih tura pawm tawh siam that ngai nia langte siam that a ni a. Hemi chungchang hi sorkara dah luh a nih hmain service association leh pawl kaihhnawih hrang hrangte ngaihdan leh thlir dan enpui leh ni se an ti a, chumi hnuah cabinet agenda turin ruahmanna siam zui zel tura rel a ni.
MERC thutkhawm hian Mizoram chhunga zirna hmasawnna hrang hrangte sawiho zuiin, zirnain hma a sawn mek chu lawmawm an ti a. Zirtirtute, office hrang hranga thawktute leh kil hrang hranga zirna hmasawnna atana beitute pawh theihtawp chhuah zel turin an ngen bawk.