- Rinfela Zadeng
Kum Zabi Sawmhnih pakhatna kan lo chuan kai meuh chuan mihring leh khawl hmasawnna nasatzia hi kan rin phak bak a ni a, kan pi leh pute’n vanram an suangtuah theih aia ropui zawk khawvelah kan cheng mek a ni tiin sawi ila thu kan uar lutuk awm lo e. Chutiang khawvela lo piangchhuak leh lo seilian mek, lo la piang leh zel turte tan chuan Pathian hian hlutna a la nei zel ang em? Sakhua leh Pathian thu thu hrim hrim te hi a hnawk viau tawh em?
- A lai takah keimahni
Indopui pahnihna hnu lam atangin khawvelin mahni ram leh hnam chawisanna mahni inhlut thiam dan a zir chhuak a. Min awp bettu Sap ho thu leh hla leh kan thluak an suk reng te chu duh loin mahni duh danin kan nung chho a. Phuartu leh thunutu kan ngaithei lo a, a tha ber nih tumin khawvelah hian hnam tin chi tin hi kan phe ta suau suau mai a nih hi ti raw u? Kan Zirlaibuah te, Pathian thu kan thlirna leh kan zirnaa te, kan rilru put hmang hrim hrimah hian keimahni a laia awmin, kan chhehvela thil dang awmte hian keimahni milin min hel kual se tih hi ka duhdan leh kan rilru put hmang a ni tawh a. Keimahni thlirna (self center prespective) atanga dik ber leh tha ber kan tih chu kan nunpui a, chu kan duhna mila min thlawptute, kan duh dan tak mila tehna (norms) min tawmpuitute chu mi changkang, mi fing, mi tun lai leh thangtharte hrethiam – tiin kan hrilhfiah ta hlauh bawk a nih hi.
- Ka duh danin ka nung thei
Khawvela ram changkang leh mihring zalenna ber USA hi kan hre vek ang a, vawikhat tal han zin ve chak kan ni fur awm e. Anni chu mihring dikna leh chanvo, mihringin a duh dan tak leh zalen taka nun hi a phuin a dikna (rights) a ni tiin mihring hi a dah lal em em a. Chuvangin hmeichhia ni reng sia – mipaa in let, mipa ni reng sia – hmeichhiaa inlet (transgender) te, mipa leh mipa innei, hmeichhia leh hmeichhia innei te, mipa emaw hmeichhia emaw pawh ni chuang loa nung ve tawp te, nupa ni si loa nula tlangval cheng dun te, mahni nuam tih dan dana nung mawp mawp mai kha an tam ta em em a. Chutiang mi chu Pastor atan pawh iai loa nemnghet duh te an lo ni ta zel tih kan hre awm e. Khawvela ram ropui leh thil tithei ber, mi chung en berin chutianga an nun an hman chu khawvelin kan entawn a. Keini Mizoramah te ngei pawh a si per changa nung tak tam kan awm tawh tih hi phat rual a ni awm lo e. Bible sawi dan emaw Pathian duh dana nun emaw kha kan ba kher lo a, ka duh dan taka mi dang pawi sawi loa ka nun hi a thiang a, ka dikna a ni tiin mahni kan thu ta ber a ni tiin kan nung ta suau suau a nih hi.
- Dik leh dik lo hi a awm tak tak lo!
Mahni kan in pathiana, a lai taka kan awm tawh avang chuan thil dik leh dik lo hi a awm tak tak thei tawh lo a, tha ka tih kha a tha ber a, mi dangin tha an lo tih ve kher kha a tul tawh lo a. Chutiang chuan kan duh dan danin, kan hawi lam lam hawiin kan nung ta a. Mi nuna buai lo tur leh mi dangte nun dan zahsak tura inzirtirna te chu thufing mawi leh tun lai – relevant – tak a ni tawh a. Mi lo zilh ve reng te, mi nun dan tur lo sawia lo phet vek sek te chu mi mawl, hmanlai mi leh mi nuna buai, mi sual leh mi rilru hrisel lo kan lo ni ta lek lek zawk a nih hi! Thuziak tawi leh tha kan tih, kan duh zawng leh min fuih phurtu, kan chhiar duh zawng leh kan nun kaihhruaitu atana kan hman duh zawng thu leh hla te pawh hi chutiang hawi chu a ni ta zel a. Facebook, WhatsApp leh Instagram lama kan status/story chhawn nasat thu leh hla te pawh hi – keimahni kan lal berna tura min thlawptu thu leh hla an ni tlangpui tawh a nih hi.
- Khawiah nge kan innghah ve?
Chutiang khawvela kan awm lai mek chuan keini hi engah tak hian nge kan innghah ve a, khawiah tak hian nge kan awm ve tih hi kan inzawhna tur pawimawh tak a ni awm e. Pathian ringtu leh Pathian thu awih kan nih chuan keini intehna tur leh kan nun innghahna tur chu Bible a ni a, chu chu kan intehna (norms) lian ber tur a ni ang. Tehna leh innghahna nei miah loa nung thei mihring kan ni lo a, zalen taka nunga an duh dan dan nung kan tihte pawh hian an intehna chu tuna an nun dan tho tho kha a ni a. Chu chu a tlo em? Chatuan daih a ni em? Pathian duh dan a ni em? Khawvelah hian vawikhat chiah nunna neiin kan piang dawn a, Pathian thu anga nunga chu chu kan dam chhung nun tehna atana hmanga a lai taka Pathian dah tlat chunga nun hmang zotu nun hi a tawp thlenga tlo leh dik a ni tih hi hre reng chunga nun hmang zo thei nih hi a la la hlu dawn chauh a ni tih hre rengin kan duhthlanna hmang thiam turin kan infuih nawn a ni e.