Aizawl: BJP Mizoram chuan Thawhtanni khan an party pisa-ah Karthar Inhlanna leh Political Session hun an hmang a. He huna thusawitu BJP State Vice President Lalduhawma chuan, “India-in zalenna a hmuh theihna tur atana Ideology pawimawh tak pakhat chu Hindutva hi a ni,” a ti.
Lalduhawma chuan India ramin zalenna a hmuh theihna atan leh hnam inpumkhatna leh culture humhimna kawngah ‘Hindutva’ chu sakhua leh nihna ringawt a nih loh thu a sawi a. India ram zalenna sualtute thinlungah he rilru put hmang hian ram hmangaihna thuk tak a tuh a, India ram zalenna sual chhuah a nih theih nan a thawh hlawk hle a ni, a ti.
BJP chu sakhuana emaw, vai pawl emaw ni lo vin, India ram hmangaihtu leh hmasawnna duhtu political party a nih thu sawiin, thalaite leh mipuite chu zalenna hma leh hnu chanchinte ngun zawka zira mahni inenfiah thin turin a chah.
Lalduhawma chuan kum 2047-a India Independence kum 100 tlinna pual a sorkar laipui hmalakna ‘Viksit Bharat 2047’ hnuaiah, India chu khawvel ram hausa leh ropui ‘Developed Country’ ni tura hma lak mek a nih rualin, Mizoram pawh ‘Developed Mizoram’ a lo nih ve ngei theih nan BJP Mizoram chuan central project leh scheme hrang hrangte kilkhawr thlenga a thlen zui theih nan State President Dr. K. Beichhua kaihhruaina hnuaiah team tharte dinin hma an la zel dawn tih a sawi.