Aizawl: Aizawl West II Assembly Constituency Ruihhlo Do Meeting chu Thawhtanni chawhnu khan Cultural Centre cum Auditorium, Aizawlah Excise and Narcotics Department Minister Lalnghinglova Hmar kaihhruainain neih a ni a. He hunah hian ruihhlo do hlawhtling tur chuan sorkar chakna chauh a tawk loh avangin kohhran, tlawmngai pawl leh khawtlang hruaitute chu thawhpuiah sawm nawn an ni.
Minister Lalnghinglova Hmar chuan ruihhlo la tichhin loten an tihchhin loh nan nasa lehzuala inzirtirna kalpui a tul thu sawiin, ruihhlo che vel khuahkhirh tura sorkar leh mipuite thawhhona chu fakawm a tih thu a sawi a. |halaiten ruihhlo an khawih tanna tura an ngaihmawh loh pawh pawi thui tak a thlen theih avangin nu leh pa, an chenpui leh zirtirtute chu an naute ngaihven reng turin a chah.
Ruihhlo ngawl vei mekte enkawlna kawngah pawh tan lak a tul thu sawiin, “Ruihhlo do turin kan la tlai chhe lo va, kan zavaia theihtawp kan chhuah phawt chuan danglamna lian tak kan thlen thei a ni,” a ti.
Thutkhawmah hian Ward no XII Corporator C Vanlalhruaii, Ward no XIII Corporator Vanlalhruaia leh Aizawl West II huam chhunga Local Council, NGO leh kohhran aiawhte an tel a ni.
Meeting hi Excise & Narcotics Commissioner Z. Lalhmangaiha’n a kaihruai a, Excise & Narcotics (Enforcement) Joint Commissioner Peter Zohmingthanga’n PowerPoint presentation hmangin Mizorama ruihhlo dinhmun tlangpui a sawifiah hnuah zawhna leh chhanna hun leh sawihona hun hmang zuiin hun hi khar a ni.