Aizawl: Aizawl khawpui hmun hrang hranga lirthei chetsualna leh traffic dan bawhchhiatna titlem tur leh mipui tana kawngpui him zawka a awm theih nan Aizawl Traffic Police chuan theihtawp an chhuah zel a. Pathianni chawhnu khan hmun pawimawh hrang hrang 44-ah special drive neih a ni a, dan bawhchhia mi 259 man an ni.
Mante zinga tam ber hi helmet khum loa two-wheeler khalh mi 148 an ni a; driving license nei lo lirthei khalh mi 39, rear view mirror/side glass awm lo lirthei khalh mi 13, leh two-wheeler-a phal aia tam inphur mi 10 an man bawk.
Tlan phal loh zawnga lirthei khalh mi 10, lirthei khalh laia meizial zu mi pariat, kum tling lo lirthei khalh mi pasarih leh lirthei ri bengchheng pathumte man an ni a. Heng bakah hian helmet dik lo khum, bull bar vuah, mud-guard vuah lo, traffic duty-te thupek zawm duh lo leh lirthei number plate duhdah taka ziak eng emaw zat man an ni.
Aizawl Traffic Police-te chuan lirthei khalhtu leh a neitute chu dan zawm kawngah tan la thar zel turin an ngen a, inthlahdah leh dan pawisak lohna avanga man ngai an la awm chho zel chu pawi an tih thu an sawi.
Khawpui kawngpuite mi tinin thlamuang leh him taka an hman theih nan mipuite chu lirthei enkawl leh tlanpui danah tan la thar zel turin an chah a. Traffic Police Media Cell chuan khawpui himna atan ‘special drive’ hi a tul ang zela kalpui chhunzawm a ni dawn tih an sawi bawk.