China chuan US-in eibara a thawhpui, Iran ‘thawchhak tura a hrekna’ a kalpui tharah a himna tur ang chu a ti dawn tih a sawi.
Beijing-a tih dan thin pangngaia Thawhlehnia thuthar lakhawmtute a kawmnaah Chinese foreign ministry thupuangtu, Lin Jian-a chuan Washington-in nawrna na zawk siam nana huang a zauh chu rang taka titawp turin a ti bawk.
“China leh Iran inkara thawhhona hi khawvel dan hnuaia kalpui niin mi dangin lo tihbuai emaw, lo inrawlh emaw a rem lo,” tiin Lin-a chuan a sawi.
“China chuan dan lova khairual lo taka inhrekna hi a do tlat tih a lo sawi fo tawh a… China chuan a dfikna chanvo leh a tana tha tur hum turin a tul ang apiang a ti ang,” a ti bawk.
China-in hetiang a sawi hi US leh Israel tang dunin Iran an beih rawn atanga thla ruk dawn hnu, US-in Tehran hrekna na tak kalpui thara China tela a thawhpui ramte pawh en hran an nih tur thu a puan hnuah a ni.
Washington hian Iran nena inkungkaihna nei ramte chu hrekna tuar chhawngtu-ah tantir a tum a, eibara hrekna an kalpui chu sorkar hrang hrangten zawm turin an ti.
Thawhtannia hrekna puan a nih hnu lawka Chinese bank-ten an tuar thei dawn em tih zawhna chu US Treasury Secretary Scott Bessent-a chuan, “US hrekna chunga awm tumah reng an awm lo,” tiin a chhang.
China hian inkahhai kalpui a duh a, US-in a hrekna hian buaina a ching fel dawn lo tih a sawi.
Beijing hi Iranian tuialhthei lei tam ram niin Strait of Hormuz khar tuar bertu zinga mi a ni.
Iran hian kum tam tak hrekna a tuar tawh a, heti chung hian khawvel huapa sum tihchetna dan bik hmangin ram dang nena insumdawn tawn theihna a nei a. Indona a chhuah hma pawh khan tuialhthei barrel maktaduai tel a thawn chhuah reng a, a tam zawk hi China-a phurh luh thin a ni.