Aizawl: Aizawl Traffic Police chuan Thawhlehni zan dar 9 atanga Nilaini khawvar dawn thleng khan special drive neih chhunzawmin, bawhchhiatna hrang hrang mi 35 an man a, heng man zingah hian bike ri ring pakua an tel.
Dan bawhchhia man takte hi driving license nei lova lirthei khalh mi 14 leh lirthei ri bengchheng khalh mi pakua an ni a; tlan phalloh zawnga tlan mi pathum, helmet dik lo khum mi pahnih, helmet khum lo mi pakhat, two wheeler-a phal chin aia tam inphur mi pakhat, rui chunga lirthei khalh mi pakhat, duhdah taka number ziak mi pakhat, lirthei tlan phal lohnaa tlan mi pakhat, register loh lirthei khalh mi pakhat leh LMV head light chhia khalh mi pakhat te an ni bawk.
Aizawl Traffic Police chuan an hmalakna a hlawhtlin zawk nan lirthei hmangtute chu enkawl dan leh khalh danah tan la thar zel turin an inchah a. Duty awm remchan lohna hmuna dan bawhchhiatna thlengte chu Traffic Control Room (9366553559 leh 0389-2313061)-ah hriattir thin turin mipui chahin, kawngpui dung a lo him a, zan lamah pawh thlamuang taka mi tin an veivah theih nan Special Drive hi a tul angin an kalpui zel dawn thu an sawi bawk.