Union Home Minister Amit Shah chuan October chawlhkar hmasa berah Manipur tlawhin medical college dinna tur lung a phum ang a, hmasawnna hna thawhte a en dawn tih Chief Minister’s Secretariat-in a puang.
Shah-a’n a tlawh tur hi Nilainia Chief Minister Yumnam Khemchand Singh-a nen Delhi-a an inhmuhnaah tihfel a ni tih Chief Minister’s Secretariat chuan a puang a, home minister hian state-a mipuite duhna tihhlawhtlinsak a tum tih a hrilh bawk tih tar lan a ni.
Home minister-in a tlawh tura ruahmanna a awm hi Manipur-ah politic-ah thu inchuh lian tak a awm mek a ni a. Meitei-ten chhiarpui neih hmaa National Register of Citizens (NRC) tih duha an nawr mek lai a ni.
State cabinet chuan tun hnai khan Naga tamna, Senapati district-ah medical college dinna turin thu a titlu.
Senapati Medical College din hian tlangram district-ah hian hriselna kawngah hmasawnna thlenin damdawi zirna a siam belh ang a, hna thar tam tak a siam dawn bawk.
October-a Shah-a’n Manipur a tlawh tur hi April 15, 2024-a inthlan campaign-a Imphal a tlawh hnua a hmasa leh ber tur a ni.
May 29 leh June 1, 2023 inkar khan chi leh chi inkara buaina a chhuah hnu lawkah ni li a lo tlawh tawh bawk a. Hemi tum hian Shah-a hian hnam hrang hrang, political party, vantlang pawl leh mi hrang hrang a kawm a ni.
May, 2023 atanga Manipur-a chi leh chi inkara buaina chhuakah hian mi 260 vel thi leh in leh lo tlanchhiatsan mi sang tel an awm tawh a ni.
Buaina chhuak zel leh Chief Minister N Biren Singh-a a bân hnuah February 13, 2025 khan President’s Rule-ah dah an ni a. Kum khat dawn hnuah hlipin kumin February 4 khan Khemchand-a kaihhruai sorkar din a ni leh ta a ni.
Sorkar hian buai laia khar kawngte a tahtawlin a hawng a, hetih lai hian NRC, chhiarpui leh assembly ramri then chungchangah politic leh vantlang pawl inhnialna a la nasa hle.
Chhiarpui hmaa NRC neih hi tuna boruak lian ber a ni a, a duhtute chuan chhiarpui hmaa neih hian Indian dik tak a tichiang thei dawn a, chu chu bial ramri thenna atan pawh a tangkai dawn niin an sawi.
MLA tam tak Delhi-ah kalin union minister hrang hrang hmuin sorkar laipui inrawlh turin an ti a. Hetih lai hian Manipur-a vantlang pawl 14 aiawhte pawhin union minister leh sorkar laipui hotute hmuin chhiarpui leh bial ramri then hmaa NRC tih a tul thu an thlen ve bawk.
Hetiang karah hian Shah-a chuan October-ah tlawh a tum a. Chief Minister’s Secretariat chuan home minister hian state sorkarin NH-2-a zalen taka kalna a siam thar leh bus pawh a tlantir leh ta chu a fak tih a tar lang.