World Health Organization (WHO) hotu lian chuan Uganda-a Ebola chi khat, Bundibugyo leng chu a tawp tawh a, an thenawm, Democratic Republic of Congo (DRC)-ah erawh a la darh mek zel tih a sawi.
Ugandan sorkar hian July 28 daih tawh khan an ramah hri a leng tawh lo tih an sawi hnuah WHO hian a puang ve ta a, mi 20 kai awmin pahnihin an thihpui hman a ni.
WHO erawh chuan tihpalha a darh tur tihchah loh a awm hlauvin tun kar thlengin a la thlithlai zui a ni.
WHO African region emergency preparedness director Dr Marie Roseline Belizaire-i chuan Nilainia WHO regional meeting-ah DRC bikah chuan inkai darh a la chak hle tih a sawi thung a. Tuna leng mek hi Ebola leng tawha a nasat ber pahnihna niin hup beh tuma hmalaknain awmzia a la nei thei lo tih a sawi.
Congolese sorkar chuan Thawhlehni thleng khan thihpui 2,700 chuang awm tawhin mi 5,600 chuangin an kai tawh tih an sawi.
“Inkai darh hi a la kal zel a ni,” tiin Belizaire-i chuan a sawi a. “A darh chak dan hi kan timuang hret hret a; mahse, a hniam zawngin a la kal tak tak thei lo,” a ti.
A kaite hnuhma chhui leh hri kai leh kai loh endik erawhin hma a sawn tih a sawi a, Bundibugyo virus an zir chiannaah darh chak hle mah se a insiam danglam tih hmuh tur a awm lo tih a sawi.
Chanchin lawmawm lam a awm rualin hri a len nasat zualna hmuna mamawh khawp damdawi leh personal protective equipment (PPE) a luh theihna turin puihna $ maktaduai 30 mamawh a ni tih a sawi bawk.
“Heng puihna tel lo hi chuan kan dinhmun hi a tha zawnga siam a harsa rih deuh niin a lang,” a ti.